Inauteri martitzenagaz batera, kolorez bete dituzte eskualdeko kaleak
Ondarrutar eta lekeitiarrek inauteri martitzena ospatu dute gaur [martxoak 4]. Ume, gazte nahiz nagusi, denek hartu dute mozorrotzeko tartea, eta kalejiran herriko kaleak zeharkatu dituzte. Arratsaldean jaiak aurrera jarraituko du.
Inauteri martitzenagaz batera kalera irten dira ondarrutar eta lekeitiarrak. Ume, gazte nahiz nagusi, denek hartu dute mozorrotzeko tartea, eta kolorez bete dituzte herrietako kaleak. Ume eta gaztetxoak izan dira gaurko protagonista, izan ere, bai Ondarroan eta baita Lekeition ere, kalejira egin dute kaleetan zehar.
Lekeition goizean goiz hasi dute eguna. Euri tanta batzuk egin dituen arren, kalejira hasterako gelditu egin da, eta hala, 10:30ean eman diete hasiera kalejirari; ateatik hasi, eta plazarako bidea hartu dute. Aurten, gainera, berriro beste hainbat urtean errepikatuko ez dituzten mozorroak jantzi dituzte. Izan ere, Lekeitioren 700. urteurreneko ospakizunekin bat egin, eta gaiarekin lotutako mota guztietako mozorroak jantzi dituzte. Kalejiraren ostean ikasleek antzezlanak eskaini dituzte frontoian, Lekeitio 700 gaiagaz.
Ondarroan, berriz, 11:30ean eman diote hasiera kalejirari. Zubi Zahar Herri Ikastola eta Zaldupe Eskolako ikasle, irakasle eta gurasoek Ibaiondotik hasi eta Itsasaurre Plazarainoko bidea osatu dute, abestuz eta dantzatuz. Ondoren, 12:15ean, kale animazioa izan dute Itsasaurren, Txirrimorraski ODLTren eskutik
Arratsaldea. Goizeko jardunak amaitu dituzten arren, arratsaldean ere egongo da egitekoa bi herrietan. Ondarroan Playback lehiaketaz jarraituko dute eguna 18:00etan, eta 18:45ean inauterietako dantzak ikusi eta dantzatzeko aukera izango dute ondarrutarrek Kresala Kultur Elkartearen eskutik. Gainera, Lantz dantzarekin amaitzeko, Miel Otxin erreko dute Itsasaurren. Egunari amaiera emateko, 20:00etan, Akulari agur esateko ordua iritsiko da, barratik hasi eta Zubi Zaharreraino egingo duten enterruagaz. Lekeition, ostera, 17:30ean txokolatada eta 18:00etan, Ai, Zapotxin umeentzako antzerki musikala egongo dira plazan (eguraldi txarrarekin Ikusgarrin). 19:30ean, ostera, suzko zezena egongo da, eta egunagaz amaitzeko, 21:00etatik aurrera DJ saioa eta mozorro lehiaketa egongo dira, Eskolapean.
