Gure Esku: "Hitzetatik ekintzetara pasatzeko ordua da"
Euskal Herria libre izan nahi duen herri bat dela munduari ikusarazteko mobilizazioa antolatu du Gure Eskuk ekainaren 7rako, Bilbon. Indarrak batzeko deia egin dute.
“Uste dugu orain dela momentua aurrera egiteko Euskal Herria egituratzeko morabidean. Bada garaia banaketa administratiboak ezarritako mugak gainditzeko eta herri gobernantza berri bat eraikitzeko. Hitzetatik ekintzetara pasatzeko ordua da”. Hala uste dute Gure Eskuko ordezkariek, eta, ondorioz, ekainaren 7an mobilizazioa antolatu dute Bilbon: Herri Libre Bat. Euskal Herriak erabaki. Bertaratzeko deia egin diete herritarrei zein norbanakoei.
Izan ere, herri gisa aurrera egin nahi izanez gero, ahaleginak batu behar direla uste dute: “Libre izan nahi duen herri bat garela ikusarazi behar diogu munduari”. Herri bakar modura euskal lurraldeen arteko kohesioa eta lankidetza sendotu behar direla uste dute, herri gisako erronkei hobeto erantzuteko eta lurra, hizkuntza eta kultura behar bezala zaindu eta defendatzeko.
Une politiko honetan, burujabetzaren auziari heldu beharra dagoela uste dute. Ze, mundu mailako potentzien arteko tentsio testuinguruan, Euskal Herriak “ahots eta ikuspegi propioa” behar duela dio Gure Eskuk: “Burujabetza handiagoaren beharra batzen gaituen aldarrikapena da. Herri gisa aitortza izatea eta erabakitzeko eskubidea erabiltzea ezinbesteko baliabideak dira”.
Hala, herritarrak zein horien ordezkariak bereziki kezkatzen dituzten erronkak gogoratu dituzte: osasungintza, etxebizitzarako eskubidea, industria, euskararen biziberritzea, gutxieneko soldataren igoera edota berdintasun politika eraginkorrak izatea. Baina, horiez gain, arazo eta lehentasun gehiago ere badaudela dio Gure Eskuk, eta azpimarratu du gai horiei heltzea eta konponbideak martxan jartzea garrantzitsua dela.
Ondorioz, eta testuinguru politikoari erreparatuta, hurrengo galdera gogoetagai proposatu dute. “Autogobernu maila koxka bat gorago jarrita, hau da, erabakitzeko ahalmen handiagoarekin, eta burujabetza osoagoarekin ez al diegu hobeto eta baliabide gehiagorekin erantzungo erronka horiei guztiei eta beste batzuei?”.
Eta, euren iritziz, erantzuna bistakoa da. “Bistan da baietz”. Hala, eginbeharrari ekiteko deia egin dute: “Balia dezagun aukera herri aitortza bermatzeko, euskarari lurralde osoan dagokion aitortza osotik hasita. Balia dezagun momentua etorkizuna eraikitzeko erabakitzeko eskubidean oinarrituta”.
