"Arrakastatsua" izan da Santa Katalinako horma irudiaren inaugurazioa
Lekeitio Lagunkoiak Jose Arrueren "Itxasgaña Txakolina" koadroaren erreprodukzioa egin dute Santa Katalina bideko aterpean. Inaugurazioan 70 lagunetik gora elkartu dira: "Herritarrez gain, Mendexa, Gizaburuaga, Ispaster eta Ondarroako herritarrak ere etorri dira".
Santa Katalina bideko ermitan hainbat lan egin ostean, joan den eguenean [martxoak 6] inauguratu zuen Lekeitio Lagunkoia taldeak bertan egin zuten horma irudia. Inaugurazioa “oso arrakatatsua” izan zen, izan ere, 70 lagunetik gora elkartu ziren bertan: “Herritarrez gain, Mendexa, Gizaburuaga, Ispaster eta Ondarroako herritarrak ere etorri ziren ekintzara”.
Bertan izan ziren, era berean, Ander Aldazabal Lekeitioko alkatea, Marta Moreno Eusko Jaurlaritzako ordezkaria eta Maite Zabala Ispasterko Lagunkoi taldeko kidea eta Bizkaiko batzarkidea ere. Aldazabalek “biziki txalotu” zuen Lekeitioko taldea egiten ari den lana. Era berean, gogorarazi zuenez, antzeko ekimenetarako udaleko baliabide tekniko guztiak eskuragarri daude, boluntario egiten diren eta herritar denen onurarako diren ekintzak gauzatzeko.
Zabalak, ostera, Lagunkoia taldearen inguruan hitz egiteko tartea hartu zuen; azaldu zuenez, Etxebarrian eta Ziortza-Bolibarren izan ezik, eskualdeko gainontzeko herri guztietan dago taldea martxan. Nabarmendu zuenez, euren arteko komunikazioan eta elkarlanean dute “hobetu beharra”. Hala ere, harro agertu zen Lekeitioko taldeak duen indar eta prestakuntzagaz.
Lekitto Bedarrako eta Lagunkoi taldeko Julian Arratek, aldiz, azaldu zuen zein izan den Jose Arrueren margolana hor erreproduzitzeko arrazoia: “100 metro ingurura Fausto Ibañez de Aldekoa bodega eta koadroa egitea agindu zuen kokapena daude”. Txakolinak herrian zuen garrantzia ere aipatu zuen, duela mende batzuetako antolakuntza eta arauak gogora ekarriz.
Ekitaldiagaz amaitzeko Pipas txakolina dastatzeko aukera izan zuten bertaratutakoek, eta baita koadro originala ikusteko ere: “Koadro originala ikusteko aukera edukitzea pribilegio modura hartu dute etorritakoek. Erreprodukzioa ere asko baloratu dute, eta ziurrenik, erreferente bihurtuko da herriko txakolinaren historia ezagutzeko orduan”.
Hurrengoak. Lagunkoi taldeak ez du etenik. Hileroko zartzuela emanaldia egingo dute eguaztenean [martxoak 12]: El barbero de Lavapies ikusteko aukera egongo da, 18:00etan, kultur etxeko Azkue aretoan. Martxoaren 19an, ostera, El olivo filmaren emanaldia eskainiko dute, toki eta ordu berean. Martxoagaz amaitzeko, 28an Denbora Bankuagaz batera lehen sorospen ikastaroa antolatu dute; aurrerago emango dituzte zehaztasun gehiago.
