'Don't be dummy! Zuk ez duzu ordezkorik' ekitaldia egongo da Ondarroako Kofradia Zaharrean
Ondarroako ikastetxeetako ikasleei bideratutako ekitaldia izango da eguaztenekoa [martxoak 12], eta bi saio egongo dira: 9:50ean, eta 11:15ean.
Gazteei zuzendutako Eusko Jaurlaritzako Segurtasun Saileko programa bat da Don’t me dummy! Zuk ez duzu ordezkorik ekitaldia, eta bide segurtasunean, “gidatze arduratsuan eta zirkulazioko istripuen prebentzioan” gazteak sentsibilizatzea da helburua. Ondarroako Kofradia Zaharrean egongo da eguaztenean [martxoak 12], eta Batxilergoko eta Lanbide Heziketako ikasleei zuzendutako bi saio egongo dira; lehenengoa, 9:50ean, eta bigarrena, 11:15ean.
Dummy pertsonaia da ekitaldiaren ardatza, eta Ugaitz Alegria ondarrutarrak jarriko dio ahotsa abatarrari, zuzenean. Ikasleek ere parte hartzeko helburuagaz, “zenbat pertsona hil ziren errepidean joan den urtean?”, bezalako galderak jarriko dira mahaigainean, eta ikasleek zuzenean erantzun ahalko dituzte, eta jarraian, erantzun zuzena jakingo dute. Horrez gain, hiru gonbidatu egongo dira; suhiltzailea, udaltzaingoa, eta trafiko istripua edukitako pertsona bat. Hiru gonbidatuek beraien testigantzak kontatuko dituzte.
Gainera, Ondarroako ekitaldiko kasuan, Lea-Artibaiko lau pertsonek parte hartuko dute ekitaldian. Alde batetik, Ugaitz Alegriak ahotsa jarriko dio protagonistari, Leire Bereikua errealizazioaz arduratuko da, Berriatuan bizi den Landerrek suhiltzaile gisa hitz egingo du, eta Ibon Oregi markina-xemeindarrak berak izandako trafiko istripuaren inguruan arituko da.
