Iñaki Lopez, 40. Atxukale Sariko bizkorrena
Iñaki Lopezek irabazi du Mutirkuko 40. Atxukale Saria, Eñaut Urkaregiri eta Unai Morani aurrea hartuta. Eñaut Blbaok mendiko saria lortu du; Cafe Dromedario-Flotanet izan da talderik onena.
Domekan [martxoak 9], Mutriku nahiz inguruak gaurko eta biharko txirrindularirik puntakoenen kokaleku izan ziren: gazte mailako 40. Atxukale Saria lehiatu zuten. Txirrindulariek 87 kilometroko ibilbideari aurre egin behar izan zioten. Punturik erabakiagarriena, hasieran, Osintxuko zeharbidea izan zen, baina amaierak gorde zuen gogortasunik azpimarragarriena. Izan ere, ziklistek Kalbario mendatea birritan igo behar izan zuten. Ihesaldi murriztu bateko esprintean, Vizcay etxeko Iñaki Lopez Rey nagusitu zen, 2.02.55eko denborarekin; ondoren helmugaratu ziren, hurrenez hurren, Eñaut Urkaregi Sanz eta Unai Moran Aranzabal, biak ala biak denbora berean.
Tropel jendetsua iritsi zen Kalbarioko aldapa pikoen magalera. Mendateak, baina, epaile lanak egin zituen, eta taldea sakabanatu egin zen; lasterketa, ostera, taldetxo txikietan txikitu zen. Helmugatik 30 km baino gutxiagora kokatutako mendate pankartapetik igarotzen lehena F2 Informatika taldeko Eñaut Bilbao Arriaga izan zen. Lasterketa mendatearen bigarren pasaeran erabaki zen. Mutrikuko herriguneko azken etxeak atzean laga bezain pronto, lasterketa buruan zihoan tropeltxoa eraso betean jarri zen.
Bere kartak mahaigaineratzen lehenegoa Cafe Dromedario-Flotanet taldeko Axular Aldazabal Urien izan zen, baina bere taldekide Jon Zuburruti Rodriguez izan zen pankarta azpian bizkorrena. Erasoek han-hemen jarraipena eduki zuten, eta inork ez zuen aginte makina argiki lortu. Hala, taldetxo batek helmugarainoko bidea egitea lortu zuen, eta garaipena esprintean erabaki zen. Esprinta goranzkoan izatea eta azken zuzengua orduko bihurgunera ederto kokatuta sartzea bere alde baliatu zituen Lopezek, eta maila handiko garaipena poltsikoratu zuen.
Argazkia: Jorge Garcia.
Podiumean Urkaregi eta Moran lagun izan zituen irabazleak. Mendiko saria F2 Informatikako Bilbaok lortu zuen, Zuburrutiren eta Urkaregiren aurretik. Taldekako sailkapenean, Cafe Dromedario-Flotanet izan zen sendoena. Aipagarria, era berean, Igamo Packaging taldeko Itxaso Plazak lortutakoa: parte hartu zen emakumezko bakarra izan zen, eta proba amaitu zuen. Maila handian aritu zen Plaza: 2.12.37ko denbora eginda. Atxukale Txirrindu Taldeak, bestalde, mendiko bizikleta bat zozkatu zuen bertaraturikoen artean, eta zenbaki irabazlea 2.664a izan zen; ordezko zenbakia, aldiz, 3.259a. Irabazleei antolatzaileekin hartu-emanetan ipintzeko deia egin diete; 626 43 87 35 telefono zenbakira deitu behar du.
