Final laurdenen lehia hasiko da Goxua txapelketan
Lehenengo mailako bi eta bigarren mailako lau final laurden ikusteko aukera egongo da Markina-Xemeingo frontoi txikian, bihartik domekara [martxoak 13-16].
Goxua txapelketan amaitu dituzte jada jardunaldi guztiak, eta final laurdenen lehiari ekingo diete, bete-betean. Joan den astean lehenengo mailako bi final laurden jokatu zituzten, eta asteon jokatuko dituzte gainontzekoak: lehenengo mailako bi eta bigarren mailako lau final laurden ikusteko aukera egongo da.
Bihar [martxoak 13] bigarren mailako lehenengo final laurdena jokatuko dute, 19:45ean, Aitzol Anituak eta Gaizka Basterretxeak, Lorenzoren eta Agirreren aurka. Barikuan [martxoak 14] ostera, lehenengo mailako Varela-Unanue eta Gorostizaga-Arandia bikoteek jokatuko dute, 20:00etan.
Zapatuan [martxoak 15], aldiz, bigarren mailako bi final laurden ikusteko aukera egongo da, 17:00etatik aurrera. Alde batetik, Arrieta anaiek jokatuko dute Lakaren eta Arrateren kontra, eta bestetik, Bustindui eta Ezpeleta neurtuko dira Andoni eta Jokinen aurka. Asteburuagaz amaitzeko, domekan [martxoak 16] 17:30ean emango diete hasiera lehiari. Lehenengo mailan, Iñakitok eta Agarrek jokatuko dute, Berasaluzeren eta Isasiren aurka. Bigarrenean, ostera, Amoto-Oier Urrutia eta Adorrixa-Gandixa bikoteen arteko lehia ikusi ahalko da.
Finalaurrekoetara, sailkatuta. Joan den asteko partidei dagokienez, lehenengo mailako bi final laurden jokatu zituzten. Alde batetik, Muñozgurenek eta Katok jokatu zuten Aldaperen eta Aranbururen aurka. Lehia estua izan zen arren, Muñozgurenek eta Katok hiru tantoko aldeagaz irabazi zuten (18-15); halaber, eurena da finalaurrekoetarako lehenengo txartela. Beste aldetik, Esnaola-Mujika eta Onagoitia-Urizar bikoteen arteko lehia ikusi ahal izan zen. Esnaolak eta Mujikak nagusitasuna erakutsi zuten kantxan, eta finalaurrekoetara sailkatzea lortu, Onagoitia eta Urizar 18 eta 8 mendean hartuta.
Gainontzeko partidei dagokienez, lehenengo mailako bat eta bigarren mailako hiru jokatu zituzten. Lehenengo mailan, Unai eta Xabat Uzuriagak lortu zuten garaipena, Txirloi eta Allendari 18 eta 10 irabazita. Bigarren mailako partidetan, lehia estua egon zen. Hiru partidetatik bitan, hiru tantoko aldeagaz gailendu ziren irabazleak. Alde batetik, Anitua-Basterretxea eta Adorrixa-Gandixa bikoteen arteko lehia ikusi ahal izan zen, eta bestetik, Arrieta anaien eta Andoni eta Jokinen artekoa; Anitua-Basterretxea eta Arrieta anaiak 18 eta 15 gailendu ziren. Bestalde, Amoto eta Urrutia nagusi izan ziren frontoi txikian, 18 eta 8 Laka eta Arrate mendean hartuta.
