Gazteen talentu musikala bultzatzeko, 'Señeak Bizkaia Rock Kanpusa'
Apirilaren 21etik 26ra bitartean Lauaxeta Ikastolak Señeak Bizkaia Rock Kanpusa hartuko du, 14 eta 17 urte bitarteko 20 musikari bizkaitarrei bost eguneko egonaldia eskainiz.
Argazkia: Bizkaiko Foru Aldundia. Bizkaiko gazte musikarien talendua bultzatzea jomuga izanik, apirilaren 21etik 26ra bitartean (Pasku astean) jorratuko da Señeak Bizkaia Rock Kanpusa, Lauaxeta Ikastolan. Bost eguneko egonaldian lehen mailako artistekin ikasteko aukera eskainiko du, alegia, kanpusak. Izan ere, Bizkaiko Foru Aldundiak Gatibu taldeko kideekin bat egin du ekimen hau aurrera ateratzeko, azaldu dutenez. Horrela da, Alex Sardui eta Ekain Alzola musikariek musika ikasle gazteei esperientzia paregabea eskainiko diotela Aste Santuan.
14 eta 17 urte bitarteko bizkaitarrei zuzenduta dagoen egonaldiak, ez ditu soilik ikasleen musika-trebetasunak hobetuko. Baizik eta bizitzako beste alderdi batzuetan baliagarriak izango diren gaitasun pertsonalak eta sozialak ere garatuko ditu, Ahaldun Nagusiaren hitzetan: “Musikaren bidez gazteen garapen integrala sustatzea da gure helburua. Tresnak ematea, sormena, talentua, trebetasun sozialak, talde-lana eta pentsamendu kritikoa sustatzeko. Euskara komunikazio-hizkuntza gisa erabiliz hizkuntza-identitatearen alde egitea, eta bide batez, elkarbizitzan ikasteko bidea eskaintzea, giro dinamiko eta aberasgarri batean”.
Gazte musikarien harrobia nabarmendu du, halaber, Sarduik: “Harrobia badago musikagintzan, baina ibilbide formaletatik kanpo profesionalki hazteko eta ikasteko aukera gutxi daude. Horregatik, Señeak bezalako bide berriak egitea ezinbestekoa dela uste dugu. Gazteei euren talentuaz gozatzea eta esperientziadun artisten eskutik ikastearen aukera paregabea eskaintzea”.
Doakoa dela ere gogoratu dute antolatzaileek, eta bide batez, izena emateko aukera oraindik zabalik dagoela azpimarratu dute. Hala, lehenetsi dute, deialdia “musika ikasketak edo musikarako trebetasuna duten bizkaitarrentzat” dela, eta izen emateak online bidez egin daitezkeela, martxoaren 25era (martitzena) arte. Www.seneak.eus webgune bidez eman daiteke izena, aditzera eman dutenez. “Minutu gutxiko bideo bi bidali beharko dituzte gazteek euren burua aurkeztuz eta talentua erakutsiz. Ondoren, artista ezagunez osatutako epai-mahaiak 20 gazte aukeratuko ditu“, gaineratu dute.
Teoria eta aisia uztartuz.
Aukeratutako 20 gazteek teoria musikala eta aisia uztartuko dituzte Lauaxeta ikastolako bost eguneko egonaldian. Izan be, eguneko lehen zatian ikasteari ekingo dioten heinean (teoria musikala, praktika instrumentala, sorkuntza artistikoa, etab.), arratsaldean aisialdiko ekintzak burutuko dituzte (irteerak, kirol ekimenak, taldelaneko proiektuak, etab.). Formakuntza hori guztia “euskal sortzaile eta musikari ezagunen eskutik” jasoko dute ikasleek, eta artisten bisitak ere izango dituzte.
Kanpusaren azken egunean, azkenik, partaideek doako kontzertua eskainiko dute Zornotza Aretoan: “Bertan, ikasitako guztia erakutsiko dute ikusleen aurrean. Esperientzia paregabea da nerabeentzat, euren irakasle eta erreferenteekin jotzeko aukera izatea”. Gauzak horrela, Señeak Bizkaia Rock Kanpusera animatzeko deia zabaldu dute antolatzaileek.
