Zaintzaileen zaintza bermatzeko hamaika zerbitzu
Zaintzaileen zaintza erdigunean jarrita, udaberriko egitaraua osatu du Lea-Artibaiko Mankomunitateak.
Lea-Artibai Mankomunitateak jorratzen dituen bi lan ildoetako bat zaintza da, eta bide horretatik, hamaika zerbitzu eskaintzen ditu. Horrenbestez, zaintzaileen zaintza bermatzeko helburuagaz udaberriko egitaraua osatu du zenbait hitzaldi eta tailerrekin.
Hala, hiru ekimen desberdin antolatu ditu Mankomunitateak udaberrian zehar. Hasteko, Familia zaintzako laguntzak. Mendekotasuna eta bere errekurtsoak izenpean hitzaldiak antolatu dituzte martxoan zehar. Ondarroan egongo da lehenengo hitzordua martxoaren 19an [eguaztena], Kofradia Zaharrean, Lekeitioko Kultur Etxean bigarrena, martxoaren 25ean [martitzena], eta Markina-Xemeingo Mankomunitatearen egoitzan hirugarrena, martxoaren 31n [astelehena]. Bestalde, maiatzean zehar Nola estimulatu nire familiarra izeneko tailerrak egongo dira; Zirotza-Bolibarko udaletxean maiatzaren 5, 12 eta 19an; Ispasterko Iñigo Egiluz Udal Aretoan maiatzaren 7,14, eta 21ean eta Berriatuan maiatzaren 27, ekainaren 3 eta 10ean, bideo gelan. Hitzordu guztiak 17:00etatik 19:00etara izango dira, eta tailerrean parte hartzeko izena eman beharko da.
Eguneko arreta zerbitzura egingo den bisitagaz eta kafe tertuliagaz emango dio Lea-Artibaiko Mankomunitateak amaiera udaberriko egitarauari. Lekeitioko Uribarren Abaroa, Markina-Xemeingo San Roke eta Ondarroako eguneko zentroetara egingo dute bisita, eta interesa duenak izena eman beharko du. Markina-Xemeingo egoitzara bisita ekainaren 2an izango da, Ondarroakora ekainaren 11an, eta Lekeitiokora ekainaren 18an; hiru bisitak 10:00etan izango dira.
Gainera, familia zaintzaileentzako laguntza psikologikoa eskaintzeko taldeak ere osatu ditu Lea-Artibaiko Mankomunitateak Ondarroan, Markina-Xemeinen eta Lekeition. Laguntza psikologikoa eskaintzen dituzten talde hauek martxan daude hiru udalerrietan; Ondarroan, Kofradia Zaharrean baten dira asteartetan, Markina-Xemeinen eta Lekeition ostegunetan izaten dute hitzordua. Lehenengoan, Mankomunitatearen egoitzan, eta bigarrenean, Kultur Etxean. Hitzordu guztiak 17:00etatik 19:00etara dira, eta Lea-Artibaiko herrietako biztanleei zuzenduta daude. Interesa duten herritarrek harremanetan jarri nahiz izanez gero, ondorengo telefono zenbakira deitu dezakete: 94-616 90 68.
