"Elkarbizitza osasuntsua" helburu duen terrazen ordenantza onartzeko azken urratsak ematen dabil Ondarroako Udala
Behin-behineko ordenantzari alegazioak jartzeko 30 laneguneko epea dagoela jakinarazi du Ondarroako Udalak.
Ondarroako Udalak espazio publikoaren parte hartze prozesua jarri zuen martxan 2023ko urrian. Izan ere, terrazak direla eta, hainbat egoera “gatazkatsu” suertatu ziren, eta herritarrek zenbait kexa eta kezka mahaigaineratu zituzten. Abiarazitako prozesu parte hartzailean hiru erpini helduta egin zuen lanketa udalak: tabernariak, herritar/auzokideak eta herriko eragileak. Prozesua bideratzeaz Argi Begi bitartekaritza enpresa arduratu zen, eta orain, ordenantza onartzeko azken urratsak ematen dabiltza.
“Elkarbizitza osasuntsua” helburu izanda, martxan jarri zuen guztia udalak, herritarrek adierazitako kexak ugariak baitziren: “Besteak beste, zarata, irisgarritasun eza, zikinkeria, okupazio handiegia, ekintza kulturalak oztopatzea eta atsedena kaltetzea”. Prozesuan zehar egindako bileretan “elkarrekiko errespetuaren garrantzia” azpimarratu zuten parte hartzaileek: “Udalaren asmoa guztion eskubideak errespetatuko dituen ordenantza bat egitea da, aisia, mugikortasuna, deskantsua eta lana orekan jarrita”.
Ordenantza lantzeko prozesua “oso konplexua” izan dela adierazi dute Ondarroako Udaletik; izan ere, ordenantza osatzeko orduan alderdi bakoitzaren ikuspegia eta legeek diotena hartu behar izan dituzte kontuan. “Oso errealitate desberdinak batzen dira herritarren artean eta horiek guztiak kontuan hartu dira; elkarbizitza helburu izanda egin dugu ordenantza hau”. Honetarako, zehaztapen araubide bat ezarri dute, eta, beraz, proportzionaltasun irizpidea kontuan izanda, arau hausteen mailatzea zein den eta zer dakarren guztiek jakiteko zehaztapen bidea baliatuko du udalak.
Prozesu “luzearen” ostean, terrazen ordenantza onartzeko azken urratsak falta direla jakinarazi dute: “Behin-behineko ordenantza hirigintza batzordetik pasa eta udalbatzak onartu ostean, alegazioak egiteko aukera zabalik dago. Alegazio horiek jaso, aztertu, eta onartu edo ez erabakiko da behin betiko udalbatzara eraman eta onartu baino lehen”. Hala, behin-behineko ordenantzari alegazioak jartzeko 30 laneguneko epea dago, eta alegazioak horretarako prestatutako orrian aurkeztu beharko dira.
