Euskaraldiagaz bat egin dute Bekobentak eta Markina BHI-k
Euskaraldiko txapak eskatzeko epea zapatuan [martxoak 15] zabalduko da. Bekobentako eta Markina BHI-ko langileek kanpainagaz bat egiteko deia luzatu dute.
Bi hilabete baino ez dira geratzen aurtengo Euskaraldirako, eta bi egun baino ez, txapak eskatzeko epea zabaltzeko. Izan ere, zapatutik [martxoak 15] aurrera egin ahalko dira eskaerak. Hala, maiatzaren 15etik 25era Ahobizi nahiz Belarriprestek hartuko dituzte txoko guztiak.
Markina-Xemeingo Bekobenta eskola publikoak eta Markina BHI-k aurtengoan ere bat egin dute Euskaraldiagaz: “Euskaraldiaren inguruan hainbat ekintza desberdin egiten ditugu. Esaterako, langile denei azalduko zaie ekimena, eta denei egingo zaie parte hartzeko proposamena”. Langileei ez ezik, ikasle nahiz ikas komunitateko kide denei ere parte hartzeko deia egingo diete.
Gaineratu dutenez, ikasleekin ere lanketa egingo dute Euskaraldiaren inguruan: “Euskara batzordea dugu eskolan, eta bertatik lanketa bat antolatzen ari dira. Oraindik guztiz zehaztuta ez dagoen arren, egin egingo dugu”. Gaineratu dutenez, hamar egunak girotzeko asmoz, eskolan hainbat apaingarri ere ipiniko dituzte.
Markina-Xemein euskararen arnasguneetako bat den arren, zalantzarik ez dute izan ekimenagaz bat egiteko: “Globalizazioaren ondorioz, azken urteetan aldaketa handiak eman dira familien profilean. Garrantzitsua dela uste dugu Euskaraldiarekin bat egitea langile eta familiek rol aktibo bat har dezaten eta ezezagunei lehen hitza euskaraz egin diezaioten”.
