Beteranoen Trinkete Txapelketako finalaurrekoak jokatuko dituzte domekan
Domekan [martxoak 23] 10:00etatik aurrera ikusi ahalko dira finalaurrekoak.
Azken bi jardunaldiak baino ez dira geratzen Lekeitioko XIX. Beteranoen Trinkete Txapelketa amaitzeko. Hala, domekan [martxoak 23] finalaurrekoak jokatuko dituzte pilotariek, eta apirilaren 6an, ostera, finala.
Joan den astean finalaurrekoetarako txartela egon zen jokoan, eta Izeitxo eta Martxel anaiek lortu zuten irabaztea, 30 eta 22 Mendez eta Ibon mendean hartuta. Halaber, lehenengo finalaurrekoaIzeitxo-Martxel eta Lander-Foster bikoteen artekoa izango da, 10:00etan: “2023ko txapeldun beteranoak, Lander eta Foster, dira faboritoak, baina gazteak hasi dira lekura egokitzen, eta sustoren bat ere eman dezakete”.
Bigarren partida, ostera, 11:00etan jokatuko dute. Rober-Egaña eta Jaunarena-Etxezarraga beteranoen arteko lehia ikusteko aukera egongo da; martxoaren 3an jokatu zuten partidan Roberrek eta Egañak lortu zuten garaipena, 30 eta 11 Jaunarena eta Etxezarragari irabazita. “Oraingoan ere faboritoak” diren arren, finalerako txartela dago jokoan, eta beraz, partida polita espero dute antolatzaileek.
