Emakumeen II. Pala Topaketa hartuko du domekan Mutrikuk
Domekan [martxoak 23] 10:00etatik aurrera Egaña frontoian elkartuko dira emakume palistak; 21 partaide izango ditu topaketak.
2023an ohiko Emakumeen Pala Txapelketari formatua aldatzea erabakita, aurtengoan iazkoarekin jarraitzea erabaki dute mutrikuarrek. Hala, domekan [martxoak 23] 10:00etatik aurrera herriko nahiz inguruko palistek hartuko dute Egaña frontoia.
Egun osoan zehar arituko dira palan. 2023ko topaketak 22 emakume bildu zituen, eta aurtengoan, gaur gaurkoz, 21 palista izango dira. Antolatzaileek adierazi dutenez, Mutriku eta ingurukoez gain, urrunagotik ere joango dira topaketara: “Mutriku, Deba, Ondarroa, Durango, Zizurkil, Zumaia… denetariko herrietatik etorriko dira. Partaide kopuruarekin gustura gaude, batez ere, ez delako izan toki batetik jende asko eta bestetik gutxi; nahaste handia dago eta inguruko jende asko”.
Hala, goiz eta arratsalde, ligaxka bat egingo dute; arratsaldean final laurden, finalerdi eta finalak jokatuko dituzte. Ostean, gainera opariren bat ere jasoko dute parte hartzaileek. Era berean, gogorarazi dute edonor joan daitekeela partidak ikustera: “Azken topaketan etorri ziren batzuk familiarekin eta giro ona egon zen. Aurten ere giro ona egotea espero dugu”.
Partaide kopuruagaz gustura geratu diren arren, mutrikuar gehiagok parte hartu ez izana penaz hartu dute: “Herritik ez da apuntatu nahi genuen beste. Jende berria etortzea nahi genuen, ze, ikastaro bat eskaintzen dugu baita ere, baina ezin izan da izan”. Hala ere, gainontzeko helburuak betetzeko bidean, pozik agertu dira: “Helburua da palan ibiltzen diren herri desberdinetako emakumeak ezagutzea, eta herrian emakumeen pala bultzatzea. Ez da maila ona eduki behar etortzeko; gazte nahiz nagusi, denentzako kirola da”.
2023ko topaketa.
