Euskal Kostaldeko Geoparkeak urteroko bisiten programaz gain, 'Flyscha haurrekin' bisita berria eskainiko du
Bisita gidatuen programa berria aurkeztu zuen atzo [martxoak 18] Euskal Kostaldeko Geoparkeak.
Euskal Kostaldeko Geoparkeak bisita gidatuen programa berria aurkeztu du. Euskal Kostaldeko Geoparkea Denboraldi berriari ekin dio Euskal Kostaldeko Geoparkeak. Mutrikuko Nautilus Ikasgune Geologikoan aurkeztu zuen bisita gidatuen programa berria atzo [martxoak 18], eta Zumaian, Deban eta Mutrikun eskaintzen diren bisiten inguruko berritasunak zehaztu zituzten, “lurraldearen balio natural, geologiko eta kultural garrantzitsua” ezagutzera emateko helburuagaz. Izan ere, aurten, ohiko bisita gidatuez eta norbere kabuz egin daitezken ibilbideez gain, berritasun moduan, Flyscha haurrekin bisita gidatuak ere eskainiko ditu.
Aurkezpen ekitaldian egon ziren Geoparkeko kudeatzailea den Leire Barriuso; Ainhize Azpiazu Mutrikuko alkatea; Marta Amonarriz, Mutrikuko Turismo teknikaria; eta Flyscha haurrekin bisita berria gidatuko duen Ainhoa Erkizia.
Aurkezpenean plazaratu zutenez, Aste Santuko oporren atarian, Geoparkeak bisita gidatuak eskainiko ditu ia egunero. Berritasuna den Flyscha haurrekin bisitari dagokionez, 4 urtetik 12 urtera arteko umeei zuzenduta egongo da, eta mineralak eta flyscheko fosilak ezagutzeko tailerra eta itsas zeharkaldia barnebilduko ditu, bi ordu eta erditan. Hala, urria amaierara arte zapatu arratsaldetan eskainiko da, eta uda sasoian, berriz, astean birritan. “Etxeko txikienek mineralak eta fosilak ezagutzeko hainbat jolas eta eskulan egingo dituzte, ordubete inguruz, eta Mutrikuko amonite erraldoien sekretuak ezagutzen aritu ondoren, itsasontziz zeharkaldia egitera abiatuko dira. Flysch beltzaren labar ikusgarriak itsasontzitik eta bertatik bertara ikusteko aukera izango dute, Mutrikuko portua eta Saturrarango hondartza ederraren artean dagoen gunean”.
Ainhize Azpiazu Mutrikuko alkateak adierazi du, bisita berria “ondarea gizarteratzen jarraitzeko udalaren apustua” dela: “Jesus Mari Narvaez eta Esperantza Azkarragaren lana aitortu beharrean gaude beste behin, euren nahiari esker zabaldu baitzen Nautilus, Mutrikuko Ikasgune Geologikoa 2007an”. Duela lau urte Nautilus espazioan udalak gela didaktiko berria sortu zuela aipatu du, “espazioaren eskaintza indartzeko”: “Ondorioz, gure ondarearen transmisioan eragin ahal izan dugu Hezkuntzaren eta Turismo jasangarri baten bidez”. Bestalde, Geoparkeko kudeatzaile den Leire Barriusok “eskerrak” eman dizkio Mutrikuko Udalari: “Benetan eskertzekoa da bisita berri honen bitartez Geoparkearen alderik ezezagunetako bat familien eskura jartzeko Mutrikuko Udalak egin duen apustu sendoa”. Gaineratu du, Geoparkea osatzen duten hiru udalerrietako bisiten “oreka aurkitzea eta kalitatean eragiten jarraitzea” dela aurtengo erronka. “Finean, kanpotik etorritako zein bertako bisitariei lurraldeak dituen altxorrak erakustea da helburu nagusia”.
15 bisita gidatu desberdin daude aukeran Geoparkean, eta urtean zehar, mila bisita baino gehiago eskainiko direla jakinarazi dute: “Bisita gidatuak euskaraz eta gaztelaniaz egiten dira, eta eskaera handiagoa dagoen irteeretan audio gidak daude eskuragarri ingelesez, frantsesez eta baita alemanez ere”. Informazio osatuagoa Geoparkearen webgunean jaso daitekeela adierazi dute, eta erreserbak ere bertatik egin daitezkeela.
