Finalaurrekoei ekingo diete Goxua Txapelketan
Barikuan [martxoak 21] 20:30ean eta zapatuan [martxoak 22] 16:30ean jokatuko dituzte finalaurrekoak.
Final laurdenak atzean utzita, erabakita daude jada Goxua Txapelketako finalaurrekoak jokatuko dituzten zortzi bikoteak. Barikuan eta zapatuan [martxoak 21 eta 22] ikusi ahalko da lehia, Markina-Xemeingo frontoi txikian.
Barikuan [martxoak 21] 20:30ean hasiko da lehia. Bereasaluzek eta Isasik joan den astean Iñakitori eta Agarreri irabazita lortu dute finalaurrekoetarako txartela (18-17), eta Muñozgurenen eta Katoren aurka jokatuko dute.
Zapatuan [martxoak 22], ostera, 16:30ean emango diete hasiera partidei. Anitua-Basterretxea eta Arrieta anaien arteko norgehiagoka ikusi ahalko da; Anituak eta Basterretxeak 18 eta 15 irabazi zuten joan den asteko final laurdena, Lorenzoren eta Agirreren aurka. Arrieta anaiek ere, tanto berdinak eginda irabazi zuten, Lakaren eta Arrateren aurka.
Bigarren partida Esnaola-Mujika eta Gorostizaga-Arandia bikoteen artekoa izango da; azken bikoteak joan den astean lortu zuen finalaurrekoetara sailkatzea, 18 eta 12 Varela eta Unanue mendean hartuta.
Finalaurrekoen lehia amaitzeko, Andoni eta Jokin neurtuko dira Amotoren eta Oier Urrutiaren aurka. Joan den astean tanto bakar batengatik lortu zuten finalaurrekoetara sailkatzea Andonik eta Jokinek, 18 eta 17 Bustindui eta Ezpeletari irabazita. Amotok eta Urrutiak, ostera, lau tantoren aldeagaz irabazi zuten, 18 eta 14 Adorrixa eta Gandixa mendean hartuta.
