Zaldi probak jokatuko dituzte asteburuan Aulestin
Zortzi partaidek lehiatuko dute zaldi mandoen proba; 1.050 kiloko harria erabiliko dute. Zapatuan [martxoak 22] 20:00etan hasiko da proba eta domekan [martxoak 23], 18:00etan.
Zapatuan eta domekan [martxoak 22 eta 23] zaldi mando probak ikusteko aukera egongo da Aulestin. Izan ere, zortzi partaidek lehiatuko dute Jabier Urberuaga eta Juan Felix Antsotegi Antso memoriala.
Hala, zapatuan [martxoak 22] 20:00etan emango diete hasiera probari. Lau partaide egongo dira: Talaia Jatetxea (Zumaia), Fermin Santamaria (Guriezo), Ibekohondo (Aulesti) eta Jose Angel Lopez (Laudio). Domekan [martxoak 23], ostera, 18:00etan hasiko dute proba beste lau partaideek: Etxetxo (Zumaia), Gartzia (Fika), Gaztiñei (Markina-Xemein) eta Enkarterri Turf Power (Zalla).
Sari potoloak eskuratzeko aukera izango dute partaideek. Zaldi mandoen probako irabazleak, Aulestiko Udalaren mantaz gain, urdaiazpikoa eta 800 euroko saria eskuratuko du. Bigarrenetik hamargarren postura ostera, honako sariak eskuratuko dituzte, hurrenez hurren: 700 euro, 650 euro, 600 euro, 550 euro, 500 euro, 450 euro, 400 euro, 350 euro eta 325 euro. Kinttopekoen sariketan, ostera, markina-xemeindarra izango da parte hartzaile bakarra. Hori horrela, partaide bakarra denez, proba amaituz gero Ilunzar tabernak emandako manta eta 300 euroko saria eskuratuko du, zaldi mandoen proban eskuratu dezakeen sariaz gain.
Aulestiko harria erabiliko dute partaideek, 1.050 kilokoa; abereen oinarrizko pisua 400 kilokoa izan beharko da, bestela, gorako kilo bakoitzeko kiloko karga hartu beharko dute. Proba Bizkaiko Kirol Federazioak kontrolatuko du, eta pisaketa saioa proba hasi baino ordubete lehenago egingo dute.
