Palestinaren auzia lehen lerrora ekartzeko helburuagaz, egun guztiko egitaraua antolatu dute Ondarroan
Palestinako genozidioa "bigarren planoan" gelditu dela salatuko dute zapatuan [martxoak 22]. Egun guztiko egitaraua antolatu dute, eta 19:00etan mobilizazioa egongo da, Alamedatik hasita.
Palestinari elkartasuna adierazi, genozidioa “salatu” eta auzia berriro lehen planora ekartzeko helburuagaz, egun guztiko egitaraua antolatu du Palestinarekin Elkartasuna ekimenak Ondarroan zapaturako [martxoak 22]. “Palestinaren auzia bigarren plano batera pasa da azken hilabeteetan, eta duela bi eguneko albisteagaz argi geratu da hori. Genozidioak 40.000 hildako utzi ditu, eta ahaztu egin dela ematen du. Su etena sinatu ostean dena konponduta gelditu zela zirudien, baina bake faltsua besterik ez zen. Hala ere, hedabide guztietatik desagertu zen Palestina“.
Beraz, Palestina jasaten ari den genozidioa berriro lehen planora ekarri nahi dute Ondarroan, auziari zentralitatea eman, eta honen aurrean antolatzeko: “Gainera, ez dugu ahaztu behar su etenaren momentu gordinean beste zenbait eraso egin dituela Israelek. Besteak beste, laguntza humanitarioa ez sartzeko mugak jarri ditu, elektrizitatea moztu du, bonbardaketekin jarraitu du eta Zisjordanian interbentzioak handitu ditu”. Duela bi egun izandako bonbardaketa ekarri dute gogora antolatzaileek, eta Israelen helburuak “argiak” direla azpimarratu dute: “Su etena Israelentzako funtzionala ez de momentuan, begira zer gertatu den. Israelen planak eta helburuak argiak dira. Ikusi egin beharko da hemendik aurrera zer gertatzen den, baina gatazkaren dimentsioa berriro handituko dela dirudi”.
Ondarroako Alamedan gauzatuko dute egitarau guztia, “herriaren erdian egoteko eta espazio zabala hartzeko”. Hala, 11:00etan emango diote hasiera egunari, harrera eta hamaiketakoagaz. Ondoren, 12:00etan, hitzaldia egongo da Palestina eta kolonizazio sionista: konplizitateak eta borroka izenpean. Ostean, herriko bi artistek murala margotuko dute, eta jarraian bertso bazkariari emango diote hasiera; Alexander Idoeta eta Aitor Zubikarai bertsolarien eskutik. “Nahi duen oro etorri daiteke bazkarira, baina eskertuko genuke aurretiaz izena ematea 644 22 74 41 zenbakira idatzita, zenbat janari egin jakiteko”. Bazkalostean Olatz eta Aiza bikote ondarrutarrak eskainiko du kontzertua, eta 19:00etan mobilizazioa hasiko da, Alamedatik. Aurreratu dutenez, haurrentzako txokoa ere egongo da egunean zehar.
Antolatzaileek zehaztu bezala, hausnartzeko eta eztabaidatzeko espazioa izango da: “Gatazka kontuan hartuta ez genuen ospakizunerako eguna izatea nahi. Hausnarketarako eta eztabaidarako tartea zabalduko dugu. Beraz, horregatik eman diogu horrelako forma egunari, eta mobilizazioa ere zentzu horretan joango da”. Eguna pasa ostean, balorazio bilera deituko dute, aurrera begira egin beharreko urratsak zehazteko.
