120 lagunetik gora batu ziren Mutrikuko Bertso Eskolak antolatutako bertso bazkarian
Mutrikuko Bertso Eskolaren hastapenetan egondako jendeari omenaldia egiteko aprobetxatu zuten zapatuko [martxoak 29] bertso bazkaria. Antolatzaileek jakinarazi dutenez, giro "paregabea" egon zen.
Mutrikuko San Juan jatetxean batu ziren zapatuan [martxoak 29] herriko bertsozaleak, Bertso Eskolak antolatutako bazkarian. Momentu “ederra” pasateaz gain, Bertso Eskolaren hastapenetan egon eta aurrera eramateko lan egin zutenei “eskertza” egiteko tartea ere hartu zuten. Antolatzaileek jakinarazi dutenez, 120 lagun inguru elkartu ziren, eta “pozik” agertu dira jendearen erantzunarekin. “Bertso Eskolako kideok oso gustura gelditu ginen, eta etorri zen jendea ere pozik atera zen. Denboran ez dugu antolatu bertso bazkaririk, eta agian, berreskuratu genezaken ekimena izan daiteke. 120 lagun inguru batu ginen arren, leku gehiago egonez gero, herritar gehiago batuko ziren bazkarira”.
Maialen Lujanbio eta Andoni Egaña bertsolariak arduratu ziren bazkaria girotzeaz, eta Bertso Eskolako kideek ere parte hartu zuten. “Bertso bazkarian zehar eskertza ekitaldia eskaini genien Bertso Eskolaren hastapenetan egon zirenei. 23 lagun aipatu genituen, eta Bertso Eskolako logoa zeukan oroigarri bat eman genien, eskertza gisa”. Malen Aldalur egungo Bertso Eskolako lehendakariak hartu zuen hasierako hitza, eta banan-banan aipatu zituen Bertso Eskolako hastapenetan parte hartu edo esku bat botatakoen izenak. “Bertso Eskolaren lehen sugarrak piztu zenituzten horietako asko zaudete gaur hemen. Duela 40 urte atzera egin eta 1985. urtea, Mutrikun, bertsozaletasuna piztu eta bideratzeko asmoz, AEK-k lehenengo aldiz bertso paper sariketa antolatu zuen, eta 2010. urtean Mutrikuko Bertso Eskolari pasa zion testigua”. Hala, hastapenetako zenbait kontu aipatu ondoren, gaur egunera ekarri zuen begirada Aldalurrek: “Gaur egun ere hor jarraitzen du Mutrikuko Bertso Eskolak, Luardon. Azkenengo solairuko lau pareten artean herritik eta herriari kantari, zortziko txiki eta hamarreko handiko neurri eta doinutan. Hori dela eta, ibilbide guztia ospatu nahi dugu gaur, eta batez ere, honaino ekarri gaituzuenoi egindako lana eskertu nahi dizuegu”.
Bertso Eskolako estatutuei buruz ere aritu ziren Lujanbio eta Egaña; izan ere, 1990ean bertso eskolaren lehendabiziko estatutuak osatu eta elkarte bezala ofizial egin zen, eta ordutik, prozesu “burokratiko luze” baten ostean, estatutuak aldatu dituztela ospatzeko ere egin zuten zapatuko bertso bazkaria. “19:00ak aldera amaitu zen saioa, eta ondoren, trikitixa doinuak lagunduta, kantuan ibili ginen. Oso giro ona egon zen, eta bazkarira joandako jendeak asko eskertu zuen ekimena antolatu izana”.
