470 gaztetxok parte hartu dute Lea-Artibaiko 33. Jolas eta Kirol Topaketan

Eskualdeko ikastetxeetako LH 5. eta 6. mailako ikasleak Markina-Xemeinen elkartu dira. Denetariko jolasak egin eta elkar ezagutzeko aukera eduki dute. Antolatzaileek egunaren balorazio positiboa egin dute.

Lea-Artibaiko 33. Jolas eta Kirol Topaketa Markina-Xemeinen

Garaia Pagola Urriza

Lea-Artibai eta Mutriku

2025/04/01

Martxoko azken egunagaz batera, 33. Jolas eta Kirol Topaketa ospatu zuten Lea-Artibaiko gaztetxoek. Hain zuzen ere, atzo [martxoak 31] eskualdeko LH 5 eta 6. mailetako 470 ikasleren topagunea izan zen Markina-Xemein. Udaberria heldu denaren erakusgarri, eguraldi eguzkitsuagaz gozatzeko aukera izan zuten gaztetxoek. Bertan izan ziren Markina-Xemeingo ikasleez gain, Ondarroako, Lekeitioko, Berriatuko, Munitibarko, Amorotoko, Etxebarriko, Ispasterko nahiz Aulestiko ikasleak.

Beste urte batez, eskualdeko gaztetxoek jolasen bitartez elkar ezagutzeko aukera eduki zuten: “Hezkuntza zentro guztietako ikasleak nahastuta eta koloreka banatuta bost gunetan aritu ziren, batetik beste mugituz. Gune bakoitzean talde berriak egiten direnez, taldekide desberdinak izan zituzten”. Hori horrela, hainbat jolas eta ariketa desberdin egin zuten, besteak beste, beisbola, errugbia, frontoiko jolasak, txokor batzea, futbola baloirik gabe nahiz zelai errea. 5. mailako gaztetxoak Bekobentako jolastokian aritu ziren, eta 6. mailakoak, ostera, BeraKruzeko jolastokian, zelaian, frontoi txikian eta Uni frontoian.

Antolatzaileek azaldu dutenez, elkar ezagutzea ere bada topaketaren helburuetako bat: “Gure herriko gaztetxoen arteko harremana osasuntsua izatea helburu garrantzitsua da guretzat. Eskolaz kanpoko kiroletan, oporretako udalekuetan, hondartzan, jaietan… elkarrekin topo egiten ditugun momentuak daude, eta asko gara urteak pasatuta ere ‘olinpiadetako’ lagunarekin kalean hizketan geratzen garenak. Topaketa eguna, egun berezia da”.

Aurtengo topaketa Markina-Xemeinen izan denez, BeraKruz Ikastolako eta Bekobenta eskolako heziketa fisikoko irakasleek hartu dute antolatzeko ardura; hala ere, proiektua guztiena denez geroztik, ikas zentro guztietako heziketa fisikoko irakasleak dira antolatzaileak. Hori horrela, balorazio positiboa egin dute antolatzaileek: “Dena espero bezain ondo atera zen, eta ikasle zein irakasleok pozik eman genion amaiera. Eskerrak eman nahi dizkiogu Markina-Xemeingo Udalari, BeraKruz Ikastolari eta Bekobenta eskolari egun polit hau aurrera eroan ahal izateko emandako laguntzagatik”.