5.777 euro bildu dituzte Berriatuko III. Jaialdi Solidarioan
Zapatuan [martxoak 29] bildutako dirua Leuzemiaren aurkako Josep Carreras Fundazioarentzako bideratuko dute.
Familia argazkiaBerriatuko Zesta Eskola Beste urte batez, eta dagoeneko hiru urte dira, Berriatuko herria eta herritarrak Leuzemiaren aurkako elkartasuna erakutsi dute, Ager herrikidea beti gogoan izanik. Zapatuan [martxoak 29] “erantzun bikaina” eman zuten eta Mendibarren frontoia txiki geratu zen elkartasun olaturako. Sarrerekin, zozketekin eta bestelako bideetatik 5.777,9 euro bildu dituzte. Dirua Leuzemiaren aurkako Josep Carreras Fundazioarentzako bideratuko dute.
Berriatuko zesta eskolatik “oso pozik” agertu dira diru kopuruagaz bakarrik ez, herritarren erantzunagaz. Gainera, lehen aldiz antolatutako Ager Saria “erabateko arrakasta” izan zela nabarmendu dute. Haurren kinieletako jokatu zituzten eta finaleko irabazleak Laia eta Oihane izan ziren. Nagusien lagunartekoan, Ion Ibarluzeak osatu zuen bikote azkenean Aritz Erkiagarekin, Eñaut Urreisti eta Mikel Mantzisidor bikote mutrikuarraren aurka.
Baina arratsaldeko “ikuskizun nagusia” Agerren klasekideek emandakoa izan zen. Frontoiko argiak itzali zituzten eta LED argi bidezko dantza saioa eskaini zuten bildutakoen gozamenerako. Lea-Artibaiko gimnasia erritmikoki hainbat dantzarik ere “ikuskizun ederra” eskaini zuten.
Antolatzaileak jaialdi solidarioa bi urte barru errepikatzeko prest agertu dira, urtero berritasunen bat edo beste sartzen dutelako. “Herritarrek dagoeneko agendan apuntatuta duten ekintza da, polita eta elkartasunez betea, beraz, prest gaude ostera ere antolatzeko emaitza bikaina ikusita”, esan dute. Bide batez, eskerrak eman nahi izan dizkiete modu batera edo bestera jaialdi solidarioaren parte izan diren parte hartzaile, ikusle edota laguntzaile guztiei. Horrez gain, egunerokotasuneko hezur muin eta odol emaileen garrantzia azpimarratu nahi izan dute.
