Eneko Sagarmendi Master Cup Irekia txapelketako finalean izango da
Eneko Sagarmendi mutrikuarrak Euskal Pilota Egokitua Master Cup Irekia txapelketako finalerako txartela lortu zuen Jon Alzugurenegaz batera, domekan (martxoak 30). Finala apirilaren 13an izango da, Donostiako Atano III pilotalekuan.
Euskal Pilota Egokitua Master Cup Irekia muga fisiko eta psikikoak dituzten pertsonentzako lehen pala txapelketa da. Hala, domekan (martxoak 30) Eneko Sagarmendi mutrikuarrak finalerako txartela lortu zuen bere bikote Jon Alzuguren errenteriarrarekin batera. Txapelketaren finala apirilaren 13an (domeka) izango dela aurreratu dute, gainera. Donostiako Atano III pilotalekua izango du eszenatoki pala egokituko txapelketaren final handiak.
Finalerako sailkapena lortzeko bidea ez da guztiz erraza izan, ordea, Sagarmendirentzat eta bere bikote den Alzugurenentzat. Izan ere, nahiz eta garaipenen bat zein beste patrikaratu dituzten, porrot ere egin dute. “Lehenengo partidua 12-1 irabazi genuen Daniel Calviño eta Imanol Garcia bizkaitarren aurka. Bigarrena, 12-0 Luis Zulaika zumaiarraren eta Lorea Iribar zarauztarraren aurka. Hirugarrena 12-2 Hodei Asteasu eta Ibai Gomez errenteriarren aurka. Finalerdietan, oro har, lehenengoa 12-5 irabazi genuen Erik Gaton donostiarraren eta Aritz Lertxundi zarauztarraren aurka. Bestea, aldiz, 9-12 galdu genuen Joseba Altuna oriotarraren eta Iraitz Huegun donostiarraren aurka”, gaineratu du mutrikuarrak.
Hala ere, Alzugurenekin “oso gustora” jokatu zuela azpimarratu du Sagarmendik, eta bien arteko “komunikazio ona” nabarmendu du, beste hainbaten artean: “Oso gustora jokatu nuen Jonekin, egia esan. Komunikazio ona eduki genuen, eta tanto bikainak egin genituen bion artean. Adibiez, Jonek goxo-goxo egindako dejada batez baliatu nintzen partidu batean, zabalera gantxo bat egiteko”.
