Mutrikuko Energia Komunitatearen eratze prozesuaren balorazio "positiboa" egin du udalak
Parte hartze prozesua hasi zenetik lau saio gauzatu dituzte, eta hurrengoa, apirilaren 8an [martitzena] burutuko da, 18:00etan, Luardon.
Goienerren eskutik, Energia Komunitatea eratzeko urratsak ematen hasi zen otsailean Mutrikuko Udala. Ordutik, lau saio burutu ditu herritarrekin, eta prozesuari dagokionez, balorazio “positiboa” egin du. Hurrengo saioa apirilaren 8an [martitzena] egingo da, 18:00etan, Luardon.
Euskal Herriko zenbait udalerritan dabiltza Energia Komunitateak sortzen, eta prozesu parte hartzailearen helburua iraultza energetikoaren erantzukizuna “denena” izatea da. “Erregai fosilen eskasiak eta horienganako menpekotasunak prezioen igoera ekarri du, eta gizarteak oinarrizko beharrak asetzeko duen gaitasuna apaldu egin da. Ondorioz, trantsizio energetikoak ingurumenari, gizarteari eta ekonomiari eragiten dio zuzenean”. Hala, Energia Komunitateak “eraldaketarako” aukera direla azpimarratu dute udaletik, “energia hobeto erabiltzeko, aholkatzeko, ohitura onuragarriak zabaltzeko eta aurrezteko”.
Prozesuan zehar gauzatzen dabiltzan saioetan erpin desberdinak landu dituzte. Lehenengoan, egitasmoaren nondik norakoak azaldu zituzten; bigarrenean, gainerako herrietan martxan dauden proiektuak ezagutu zituzten; hirugarrenean, energia fakturak ulertzeko eta aurrezteko tailerra eskaini zuten; eta laugarrenean, jorratu daitekeen bidea definitzen hasi zen talde motorra. “Hain zuzen, arlo juridiko administratiboa jorratzeko, energia proiektuak aztertzeko eta komunikazioaz arduratzeko eskarmentua duten herritar ahaldunduz osatutako hiru lan talde osatzen dabil komunitatea”. Gaineratu dute, taldeko ateak irekita daudela, eta interesa duen orok parte hartu dezakeela: “Ez dago aditua izan beharrik, denborarekin ari dira ikasten eta talde zenbait eta anitzagoa izan, orduan eta aberasgarriagoa izango da egitasmoa”. Gizonezkoen ikuspegiak “gehiegizko” pisua ez hartzeko, emakumeen presentzia handitzean ere jarri dute fokua.
Sorkuntzaz gain, herritarren kontzientziak piztu nahi dituzte prozesuarekin: “Energia gehiago egoteko instalazio gehiago egin behar ditugunaren ideia aldatu nahi dugu. Hau da, kontsumitzen ez den energia garbiena eta merkeena dela barneratu behar dugu”.
Mutrikuko Udaletik jakinarazi dute “momentu erabakigarria” dela, eta interesa duten herritarrak gonbidatu dituzte prozesura: “Momentu erabakigarri baten aurrean dago komunitatea, izaera juridikoa eta garatu beharreko proiektua taldean erabakitzeko gaiak direlako. Beraz, interesa duen edonor gerturatu dadila apirilaren 8an, 18:00etan Luardora. Jorratuko den gaia autokontsumo partekatua izango da, instalazio fotovoltaiko batetik hainbat erabiltzailek elektrizitatea kontsumitzeko jarraitu beharreko pausoak azalduko dira. Animatu zaitez, ez zara damutuko!”.
