Ramirez de Arellano eta Sagardoy gailendu dira Ispasterko mendi bizikleta lasterketan
Domekan [martxoak 30] Green Series Txapelketa hartu zuen Basokoetxe industriagune ondoko basoko zirkuituak.
IrteeraIspasterko Udala Mendi bizikleta izan da protagonista azken astean Ispasterren. Green Series txapelketaren harira, kirola txikienen artean bultzatzeko ekimenak antolatu dituzte herrian. Haurren Astearen barruan, besteak beste, ginkana eta saio praktiko bat eskaini zituzten antolatzaileek. “Harrera ona” izan duela nabarmendu dute, nahiz eta eguraldiak gehiegi lagundu ez bazuen ere.
Domekako [martxoak 30] lasterketarako, ordea, Basokoetxe industriagune ondoko basoko zirkuituak pentsa baino hobeto aurkitu zuten txirrindulariek. “Aurreko egunetan egindako euriaren ostean, lurrak oso ondo hartu zuen ura eta ez zen baza gehiegirik sortu, are gehiago lehor egon da ibilbidea”, azaldu dute. Gauzak horrela, parte hartu zuten 210 txirrindularik baino gehiagok mendi bizikletarako eguraldi eta ibilbide ezin hobeaz gozatzeko aukera izan zuten.
Sei kategoria desberdinetan lehiatu zuten, nesketan zein mutiletan, gazteenetan zein beteranoenetan. Elite mailan, emakumezkoetan Estibaliz Sagardoy Zunzarren izan zen azkarrena, ordubete, 15 minutu eta 17 segundo behar izan zituen 16,4 kilometroko ibilbidea osatzeko. Bigarren Tatiana Saitarova izan zen 47 segundora eta hirugarren Amelie Laquebe 4 minutu eta 23 segundora. Gizonezkoetan, Jose Miguel Ramirez de Arrelanok irabazi zuen 1:32:26ko denboragaz, 45 segungora heldu zen Nathan Celie eta minutu batera Eneko Oliveira Rodrigo.
Junior mailan, Raul Lopez Sainz eta Monica Estrada Martinezek lortu zuten garaipena, bigarrenak gainera alde handiagaz. Kadeteetan, berriz, Imanol Garces Yabar eta Maider Lorenzo Alonso izan ziren garaileak. Beteranoetan, Master 30 kategorian, Iñaki Carro Meabe izan zen onena, Master 40an Jonathan Larrañaga Lopez eta Master 50-60 mailan Jose Luis Iñorbe Agirre.
