Badator Lai Koloreak azokaren hirugarren aldia
Bihar [apirilak 3] egingo dute azoka, Lea Artibai Ikastetxeko zelaian. 11:00etatik 13:00etara bigarren eskuko azoka, herrialde askotako jakien dastaketa eta dantza erakustaldia egongo dira.
Aurreko bi urteetako formatuari jarraituz, Lea Artibai Ikastetxeak hirugarrenez antolatu du Lai Koloreak azoka. Hala, bihar [apirilak 3] 11:00etatik 13:00etara eskualdeko kultur aberastasuna “ezagutzeko, ospatzeko eta gozatzeko” aukera egongo da ikastetxeko zelaian. Antolatzaileek azaldu dutenez, ikastetxeko ikastaroetako kultura eta tradizio askotasko pertsonak bilduko ditu azokak.
Hori horrela, parte hartzaileetako bakoitzak bere ohitura, gastronomia, musika eta artea partekatuko ditu bertaratzen direnekin: “Bigarren eskuko artikuluak trukatzeko jarriko diren postuak bisitatzeko aukera egongo da, hala nola, erropak, liburuak, jolasak eta beste hainbat gauza. Horrez gain, herrialde askotako jaki ohikoen dastaketa zabala eskainiko dute ikasleek beraiek prestatuta, eta lan artisauak ere erakutsiko dituzte”.
11:00etan zabalduko dituzte azokako ateak; bigarren eskuko azoka, kultura askotako gastronomia eta artisauen lanekin. 12:00etan, ostera, herri kirolak egingo dituzte, eta 13:00etan, munduko hainbat lekutako dantza eta musikagaz gozatzeko aukera egongo da, partaideek egingo dute erakustaldiagaz.
Antolatzaileek dei egin diete eskualdeko herritarrei azokara joateko: “Lai Koloreak azoka aukera bikaina da gure gizartean elkarrekin bizi diren tradizioen inguruan ikasteko. Musikaren, dantzaren, jokoen eta gastronomiaren bidez, kultura trukea eta integrazioa sustatuko dira, adin guztietara irekitako giro inklusibo batean”.
