Bizkaiko Foru Aldundiak ontzi arinen birziklatzea bultzatzeko kanpaina abiarazi du
Bizkaiko Foru Aldundiak Hori da/Ez da horia, kanpaina aurkeztu du gaur [apirilak 2], "hondakinak kudeatzeko sistema hobetu eta herritarrak sentsibilizatzeko konpromisoa sendotu" asmoz. Ekimenaren barruan azoka ibiltaria dago, hainbat udalerri zeharkatuko dituena, besteak beste, Markina-Xemein.
Argazkia: Bizkaiko Foru Aldundia Ondo birziklatzea “funtsezkoa” denaren jakitun izanik, Bizkaiko Foru Aldundiak Horia da/Ez da horia kanpaina prestatu du, Ingurune Naturala eta Nekazaritza Sustatzeko Sailari atxikitako Garbiker sozietate publikoaren bidez. Gaur [apirilak 2] eman diote hasiera ontzi arinak hobeto bildu eta ontziok bereizten “gero eta akats gutxiago” egitea helburu dituen kontzientziazio-kanpainari. Bilbon aurkeztu dute, eta bertan izan dira Elixabete Etxanobe ahaldun nagusia eta Arantza Atutxa diputatua, eta biek gogoratu dute edukontzi horia ontzi arinetarako baino ez dela.
Izan ere, ontzi arina biltzeko orduan ikusi den “arazo nagusietako bat” edukiontzi horira zer bota behar den argi ez izatea da; azpimarratu dutenez askotan “edukiontzi horia eta platikozko edozen objektu lotzen ditugu”, eta ondorioz, “hondakin-banaketa okerren tasa handia” sortzen da, birziklatze-prozesua zailduz. Gainera, sarri beste material batzuetako ontzi arinak ere (lanak eta brikak, adibidez) okerreko edukiontzietan sartzen dira, eta horrek “eragina” du hondakinak tratatzeko sistemaren eraginkortasunean. Egoera horri aurre egiteko sortu du aldundiak Hori da/Ez da horia kanpaina, “jatorrian bereizketa hobetuz birziklatzearen kalitatea hobetzeko”.
Argazkia: Bizkaiko Foru Aldundia
Kanpaina honen bitartez aldundiak “hondakinak kudeatzeko sistema hobetu eta herritarrak sentsibilizatzeko konpromisoa sendotu” nahi ditu, “birziklatze prozesua optimizatzeko eta gizartean ohitura jasangarriagoak sustatzeko”.
Jarduera interaktiboak.
Hori da/Ez da horia kanpainaren barruan garatuko diren ekimenen artean azoka ibiltari bat dago, gaur hasi eta abuztuaren 30a bitartean Bizkaiko 12 udalerri bisitatuko dituena. Eskualdeko geldialdia Markina-Xemeinen izango du, abuztuaren 23an [zapatua], 10:00etatik 15:00etara bitartean. Aurreratu dutenez azokak “herritarrak sentsibilizatzeko jarduera interaktiboak” izango ditu; bi edukiontzi jarriko dituzte, bata horia eta bestea urdina, edukiontzi horian zein hondakin sartu behar den eta zein ez “modu praktikoan azaltzeko”.
Era berean, familia tailerrak ere egongo direla iragarri dute, eta horietan, parte hartzaileek ontzi arinen inguruan ikasiko dute, jolasen bitartez. Gaur hasi den azokan, gainera, kaleko-antzerki ikuskizunak ere egongo dira. Azaldu dutenez, “aktoreak jende artean eta jenearekin harremanetan arituko dira, sentsibilizazio-ikuskizunak indartzeko”.
Halaber, Atutxak kanpaina “kirol-ekitaldi handietan” egingo dela zehaztu du, horietan jende asko biltzen dela aprobetxatzeko, eta, horrela, “birziklatze mezua helarazteko eta hondakinen bereizketa hobea sustatzeko”.
Goizeko aurkezpenean, gainera, Hondakin Go! gailu mugikorretarako jokoa ere ezagutarazi dute. Azaldu dutenez, gaurtik aurrera martxan dagoen Garbikerrek garatutako jokoak jolasaren bidez hondakinak behar bezala sailkatzen ikateko aukera emango die erabiltzaileei, eta horrez gain, sariak irabazteko aukera ere izango dute. Jokoa deskargatu ondoren, jolasten ibiltzen diren guztiek automatikoki lehiaketa batean parte hartuko dute, eta lehenengo 20 sailkatuek 50 euroko opari txartel bat jasoko dute, Bizkaiko Koopera Store sarean gastatzeko. Lehen hiru sailkatuek, gainera, beste opari txartel bat jasoko dute, 600 eurokoa, 400 eurokoa eta 200 eurokoa, hurrenez hurren. Laugarren eta hamargarren postuen artean sailkatzen direnek, berriz, 100 euro jasoko dituzte, kirol materialetarako dendetan erabitzeko.
Argazkia: Bizkaiko Foru Aldundia
22,179 tona.
Etxanobek birziklatzea “garrantzitsua” dela nabarmendu du, “lurraldea hondakinen bilketaren eta sailkapenaren buruan” dagoela zehazteagaz batera. Era berean, oraindik zer hobetu badagoela azpimarratu du, “bai gaikako bilketan, bai ondorengo sailkapenean”. Atutxak, bestalde, kanpainak Bizkaiko hondakinen kudeaketari ekarriko dion honekuntza nabarmendu du.
Ontzi arinen bilketari dagokionez, “historiako mailarik gorena” lortu zen iaz Bizkaian: izan ere, 22.179 tona bildu ziren, 2023an baino %4,01 gehiago. Hala ere, edukiontzi horian gaizki sartu direnen ehunekoa “esanguratsua” dela zehaztu dute, “nahiz eta Espainia mailako ehunekotik txikienetako bat den, %21 ingurukoa”. Gainera, hondakinak tratatzeko Bizkaiko Zabor Birziklategia (BZB) ireki berri dute, eta horrek “ehuneko hori murrizten” lagunduko duela azaldu dute, “material gehiago berreskuratzea eta lurraldean birziklatzea eraginkorragoa izatea” ahalbideratuko duelako.
Hondakin mota bakoitza ze edukiontzitan utzi behar den erabakitzeko orduan zalantzak baldin badaude Bizkairezikla tresna digitala erabili daitekeela gogoratu dute aldunditik. Tresna hori Garbikerren webgunean dago, eta bertan kontsultatu daiteke katalogoko hondakin bakoitza (6.000 hondakin baino gehiago ditu) zein edukiontzitan utzi behar den.
