Lekeitioko basilikako organoa zaharberritzeko elkarlanean dihardute herritarrek
Joan den zapatuan [martxoak 29] hainbat musikarik kontzertua eskaini zuten zaharberritzerako dirua eskuratzeko. Ekarpen ekonomikoak egiteko bideak zabaldu dituzte.
Lekeitioko Andra Mariaren Zeruratzea Basilikako organoa “gaixorik” dagoela eta, Lekeitioko Basilikako Organoaren Lagunak Elkartearen ekimenez, A. Cavaille-Coll organoa zaharberritzeko lanean dihardute hainbat herritarrek. Horren erakusgarri izan zen joan den zapatuan [martxoak 29] hainbat musikarik eskainitako kontzertua.
Antolatzaileek azaldu dutenez, kontzertuaren helburua, musikagaz gozatzeaz gain, zaharberritze horretarako dirua batzea izan zen. Hala, “oso pozik” geratu dira herritarren erantzunagaz: “Kontzertua zoragarria izan zen, eta txalo zaparrada ugari eskaini zituzten”. Oihana Etxabe mutrikuarraren zuzendaritzapean aritu ziren Kantakai Korala, Kilin Kala Abesbatza eta Miren Eeles piano jotzailea, eta Aritz Labradorren zuzendaritzapean, ostera, Musikaiako txistu banda ariko da. Azkenik, organoa jo zuen Pedro Guallarrek.
Herritarren laguntza. Elkarteko kideek azaldu dute organoko tutuak babesteko kanpaina ipini dutela martxan: “Gure organoa berrizteko diru kopuru handia batu behar dugu, 600.000 euro, gutxi gorabehera. Horretarako Lekeitioko Basilikako Organoaren Lagunak elkartetik, beste ekintza batzuen artean, organo tutuak babesteko kanpaina hastea erabaki dugu”.
Hala, ekonomikoki laguntzeko aukera zabaldu dute: “Edonork babestu dezake proiektua: pertsona bakar batek, nahiz familia, kuadrilla, txoko, elkarte edo erakunde batek”. Organoak 1.300 tutu baino gehiago dituela azaldu dute, tamainaren arabera sailkatuta; hori horrela, tutuaren tamainaren araberako ekarpena egiteko aukera egongo da. Tutu txikiak 50 euroren truke babestu ahal izango dira; ertainak, 100 euroren truke; eta handiak, 200 euroren truke. Ekarpenak Bizum nahiz transferentzia bidez egin daitezke. Informazio gehiagorako 665 70 17 22 telefono zenbakia eta lebaorlekeitio@gmail.com helbide elektronikoa ipini dituzte eskuragarri.
