17 parte hartzaile izango ditu Pazkoetako 70. idi probek
Barikuan [apirilak 4] hasiko dira eta martitzenera arte [apirilak 8] egingo dituzte saioak bost txandatan.
Etxebarriko Pazkoetako idi probek 70 urte betetzen dituzte aurten eta parte hartze zabala izango dute beste urte batez. Hainbestekoak dira bost egunetan banatu behar izan dute Sari Nagusia, barikuan [apirilak 4] hasi eta martitzenera arte [apirilak 8] luzatuko dira saioak. Jardunaldi guztiak 21:00etan hasiko dira probalekuak, domekako [apirilak 6] saioa izan ezik, 17:00etan hasiko dela.
Guztira 17 parte hartzailek eman dute izena. Barikuan [apirilak 4] Errezilgo Belamendi, Lezoko Julen Sarasua eta Billelako Iñaki Lopategi ariko dira. Zapatuan [apirilak 5], Hondarribiko Igone Pagadizabal, Urrestillako Olalde, Ezkioko Construcciones Etxaide eta Bermeoko Judith Goenagaren txanda izango da. Domekan [apirilak 5], berriz, Zamudioko Zumeltzu, Zallako Zornotza Anaiak, Eibarko Mendigoitxi eta Elgoibarko Soartek lehiatuko dute. Astelehenean [apirilak 7], Bermeoko Rafa Alegria, Ezkioko Igeldo eta Muruetako Motxo arituko dira nor baino nor gehiago. Azkenik, asteartean [apirilak 8] Muruetako Kamiñoko Erretegiak, Maruriko Billabaso Elkartea eta Lezoko Olatzar Eraikuntzak itxiko dute txapelketa.
Iaz Billabaso Elkarteak jantzi zuen txapela 48 untza eginda. Aurtengo irabazleak 1.600 euro eta Ituarte Pentsuaken manta jasoko du. Horrez gain, hamabigarren postutik atzera geratzen direnei, gutxienez 25 untze eginez gero 500 euroko dieta jasoko dute. Lea-Artibai eskualdeko lehenengoak ere saria jasoko du: 300 euro eta Ezenaro Aroztegiaren akuilua, hain zuzen ere.
