2030. urtera begirako ikuspegia izango duen ekintza planarekin dator 'Mutriku, herri bizigarri' prozesua
Mutrikuko Udalak martitzenean [apirilak 1] aurkeztu zuen klima aldaketari eta energia trantsizioari buruzko ekintza plana. Honetarako, udalerriko sektore ezberdinen ordezkariekin parte hartze saioak gauzatu ditu.
2024ko apirilean abiarazi zuen Mutrikuko Udalak Mutriku, herri bizigarri prozesua, klima aldaketari eta energia trantsizioari buruzko ekintza plana diseinatzeko helburuarekin. Honetarako, joan den udaberrian landutako diagnostikoa oinarritzat hartu dute, eta udalerriko sektore ezberdinen ordezkariekin parte hartze saioak gauzatu dituzte. Hala, 2030 urtera begirako ekintza plana eskuartean dauka Mutrikuko Udalak, “sektore guztiek egindako ekarpenei eta udal mailan gauzatutako lanketari esker”. Herritarrei bideratutako martitzeneko [apirilak 1] bileran plazaratu zituzten nondik norakoak.
Aurkezpenean ekintza planaren edukia azaldu eta hurrengo pausoak ezagutzera eman zituzten. Gainera, jakinarazi zuten, ekintza planaren indarraldia 2030. urtera bitartekoa bada ere, 2050. urterako ikuspegia ere aintzat hartzen duela: “Lortu nahi diren helburu estrategikoak udalaz gaindiko klima aldaketaren estrategia eta bide orriarekin bat datozelako”.
Mutrikuko klima eta energia planari dagokionez, sei helburu zehaztu ditu udalak: “Lehenengoa, udalaren eskutik datorren 2023. urtera begirako tokiko plana lantzea izango litzateke; bigarrena, klima aldaketa arintzearen eta egokitzapenaren ikuspegitik, udalerriaren abiapuntuko egoera ezagutzea; hirugarrena, energia eta klimaren baitan dagoen legedia betetzen laguntzea; laugarrena, udalari tresna estrategiko bat ematea arintze eta egokitze neurriak planifikatzeko eta sektoreen emisioen sorrerari eta diagnostiko fasean identifikatzen diren inpaktu kateei erantzuteko; bosgarrena, Mutrikuko Udalaren gobernantza klimatikoaren oinarriak ezartzea; eta seigarrena, erronka klimatikoa partekatua izan dadin, elkarte sarearen, hezkuntza komunitatearen, enpresa sektoreen eta, oro har, herritar guztien artean gizarteratzea eta herritarren partaidetza ahalbidetzea”.
Honekin lotuta, ekintza plana nola osatu duten ere zehaztu zuten. Lehenengo, energia egiturari eta klima aldaketaren arintzeari dagokienez, abiapuntuko egoera zein den ezagutzeko diagnostikoa gauzatu zuten, eta ondoren, erreferentziazko lege esparruak begiratuz, energia trantsizioarekin eta klima aldaketarekin zerikusia duten arloetan udalei zuzendutako betebeharrak zeintzuk diren aztertu zituzten. Gainera, udal barruko lanketak ere burutu dituzte, teknikariekin eta Ekologia Batzordearekin. Horrez gain, sektore ezberdinekin bi lanketa desberdin eraman dituzte aurrera. Alde batetik, aurrez aurreko elkarrizketa saioak egin zituzten 2024ko irailean, gizarte eragile zein ekonomikoekin, eta irailean eta urrian, online elkarrizketak egin zituzten, eragile estrategikoekin. Beste aldetik, podcastak ere egin dituzte. Gainera, online galdetegia ere bete zuten 15 herritarrek 2025eko otsailean.
Udalerriko zein udaleko BEG isurketak ere jarri zituzten erdigunean, eta energia kontsumoari buruz ere aritu ziren. Hala, Klima eta Enegiaren tokiko planari buruzko informazio guztia Mutrikuko Udalaren webgunean dagoela jakinarazi dute.
