Lekeitioko portuak hartuko du Gazte Duatloia
Zapatuan [apirilak 5] 12:00etatik aurrera egingo dute Garraitz Kirol Taldeak antolatutako duatloia.
Garraitz Kirol Taldeak antolatuta, Lekeitioko Portuak Gazte Duatloia hartuko du zapatuan [apirilak 5], 12:00etatik aurrera. Eskola Kiroleko adinean dauden gazteek parte hartu ahal izango dute proban, hau da, 2010 eta 2016 urte artean jaiotako gazteek.
Duatloia plazako eskaileren aurrean hasi eta amaituko da. Bi kirolez osatuta dago, korrika eta bizikleta eta ibilbidea luzeago edo laburrago izango da adinaren arabera. Hasteko gazteek korrikaldi bat egingo dute abadeen moilan zehar, ondoren antolakuntzak jarritako box-etan bizikleta hartu eta Lekeitioko portuan zehar abiatuko dira puntako gruan bira emanaz. Behin bizikletako ibilibidea egin ondoren, berriz ere korrika abiatuko dira abadeen moilara.
Kimuek 500 metro osatu behar dituzte korrika, 1,1 kilometro bizikletan eta beste 200 metro korrika. Alebinek 500 metro aringa-aringa, 1,6 kilometro bizikleta gainean eta beste 500 metro korrika. Azkenik, infantil mailako parte hartzaileek kilometro bat egin beharko dute korrika, gero 2,2 kilometro gurpil gainean eta 500 metroko azken esprintagaz amaitu.
Garraitzetik gogoratu dute kontuan izateko bizikletan egingo duten ingurua galtzada-harrizko bidea izango dela. Hau da, bideko zein mendiko bizikletak erabili ahal dira, baina aurrekoa kontuan izan. Era berean azpimarratu dute kaskoa erabiltzea derrigorrezkoa izango dela.
