Lekeitioko Udalak Antzoriz-Eluntzetako lur eremu osoa herriratu du
2023ko urte amaieran erositako 200.000 metro karratuko lur eremuari beste 9.000 metro karratu gehitu dizkiete. Eremu osoa herriratuta, bertan zer egin erabakitzeko prozesuagaz hasiko dira.
Lekeitioko Udalak 2023ko abenduan lortu zuen 200.000 metro karratuko Antzoriz-Eluntzetako lur eremua erostea, eta asteon erosi berri dute Maderas de Lekeitioko eremu guztia herriratzeko geratzen zitzaien lur zatia: garai batean egurra lehortzeko erabiltzen zen 9.000 metro karratuko eremua erosi dute.
Lur eremu guztia herriratuta, proiektua diseinatzeko aukerak “handitu” egin direla adierazi dute: “Pausu berri honekin, duela urte batzuk hainbat lekeitiarrek parte hartu zuten prozesuari bultzada berri bat eman zaio. Izan ere, behin jabetza osoa udalarena izanda, proiektu zehatz bat diseinatu eta gorpuzten hasteko egoeran geundeke”. Hala, udala “lan batzuk aurreratzen” hasi den arren, datozen hilabeteetan herritarrekin hasiko dute lur eremu horretan zer egin erabakitzeko prozesua: “Duela hiru urte egindako parte hartze prozesuaren emaitzak eta 2025ean Lekeitiok dituen erronkak batzeko ariketa bat egin dugu Lea Artibai Fundazioarekin elkarlanean, eta bertatik Maderas eremurako lehentasunak zeintzuk liratekeen definituago legoke. Hala ere, hori hasiera baino ez da”.
Hori horrela, herritarrekin zehaztuko dute zein erabilera eman nahi dieten lur eremu hari: “Udalak argi dauka Antzoriz-Eluntzetako lurrak herriarenak direla, eta bertan egingo dena herriak erabaki behar duela. Horregatik, parte hartze prozesuan herritarrek emandako iritziak dira planteamenduaren erdigunea eta etorkizunean ere horrela izango da”.
Behin eman nahi dioten erabilera erabakita, bideragarritasun plana egiteari ekingo diete: “Hori izango da erabakitako proiektua gauzatu ahal izateko sortu beharko den hirigintza tresna”. Bideragarritasun plana bere baitan hartu beharko ditu hainbat lege arau: Lekeitio eta Ispasterko planeamenduei lotutakoak, eta Kostako Legeari edo ingurumenari lotutakoak.
Lau norabide. Udalak jakitera eman duenez, duela hiru urte egindako prozesu parte hartzaileko ondorioak aztertu ditu kanpo epresa batekin, “gaurko eta etorkizuneko Lekeitiok dauzkan erronkak ipar hartuta”; hala, Maderaseko proposamen bat landuko dute herriarekin partekatzeko. Hori horrela, ondorioei dagokienez, Antzoriz-Eluntzetako proiektua lau norabidetan kokatzen dela ondorioztatu dute.
Alde batetik, ingurumen krisiaren aurrean, Lekeition energia burujabetzan pausuak ematea “ezinbesteko apustu estrategikoa” dela ondorioztatu dute; halaber, energia berriztagarriak sortzeko proiektuak ipiniko dituzte bertan.
Beste “apustu estrategiko” bat Lekeition lana sortzea dela nabarmendu dute: “Horregatik, aktibitate ekonomiko desberdinak martxan ipintzeko espazioak utzi beharko dira bertan”.
Bertan dagoen gune berdeari dagokionez, dagoen moduan mantendu eta uztea beharrezkoa dela azaldu dute: “Gaur eguneko ingurumen krisiaren aurrean arduratsuak izan nahi badugu, gune berdeak zaindu behar ditugu. Horregatik, gune berde horretan kokatzeko lehen sektorearekin lotutako proiektuak aztertzen ari gara”.
Azkenik, herritarrek ere guneaz gozatzeko aukera edukitzea “lehentasuna” dela adierazi dute. Horregatik, aisialdirako egin daitezkeen egokitzapenak ere aztertuko dituzte.
