"Urte osoko gaztetxeko jarduna ikusarazi eta aldarrikatzeko eguna izango da"
Gaztetxeko jarduna kalera ateratzeko helburuarekin, Gaztetxe Eguna antolatuko dute Mutrikun, apirilaren 12rako. Herriko eragile desberdinekin gauzatutako elkarlanaren ondorioz, egitarau «zabala» prestatu dute gazte asanbladako kideek.
Marina Basurko eta Onintza Orue, Mutrikuko Gazte Asanbladako kideak. Duela urte batzuk antolatu zuen lehenengo aldiz Mutrikuko Gazte Asanbladak Gaztetxe Eguna. Bi urteko geldialdiaren ostean, joan den urtean eguna berreskuratzeko apustua egin zuten asanbladako kideek. Aurten, formatu “zabalago” batekin lurrartuko du Gaztetxe Egunak Mutrikun, apirilaren 12an. Gazte asanbladako kide diren Marina Basurko Pagoaga eta Onintza Orue Azpiazu “pozik” agertu dira eskuartean daukaten egitarau oparoarekin.
Apirilaren 12rako antolatu duzue Gaztetxe Eguna. Zer dago ospatzeko?
Marina Basurko Pagoaga: Jardun politikoa ikusarazteko beharrezkoak dira ospakizunak, eta horrelako egunak aprobetxatu egin behar dira. Apirilaren 12a urte osoan zehar aurrera eramaten dugun gaztetxeko jarduna ikusarazi eta aldarrikatzeko eguna izango da. Gaztetxeen beharrezkotasuna erdigunera ekarriko dugu, eta kalera aterako gara, herriko gaztetxearen garrantzia aldarrikatzera.
Onintza Orue Azpiazu: Gainera, egungo testuinguru orokorrari ere erreparatu nahi diogu. Hau da, utzarazteen auzian edo gaztetxe berrien loratzean ere jarri nahi dugu fokua, guzti honek ere garrantzia izan baitu eguna antolatzeko orduan. Guk ere ekarpena egin nahi diegu egun erdigunean dauden auziei, eta herrian gaztetxea izatearen beharra azpimarratzeaz gain, gaztetxeen aldeko borrokaren aldarria aterako dugu kalera.
Gaztetxea politika egiteko espazioa da guretzat
Gaztetxea erdigunean jarriko duen eguna izanik, zer-nolako zentralitatea dauka gaztetxeak Mutrikun?
M.B.P: Guretzat gaztetxea politika egiteko espazio bat da. Uste dugu, egun, despolitizazioa oso orokortuta dagoela, eta gaztetxeak despolitizazioari aurre egiteko tresnak direla. Gazteak politikara hurbildu eta kontzientzia hartzen hasteko espazioak dira, lehenengo eztabaidak eman eta interesak asetzeko beharrezko elementuak. Gainera, faxismoari bide ematen dioten ideia atzerakoiez inguratuta gauden honetan, gaztetxeak bezalako espazioak beharrezkoak dira ideia askatzaileen transmisiorako. Horrez gain, gaztetxeak espazio seguruak izan behar dira, eta ezin diegu ideia baztertzaileei lekurik egin.
Eguna bera herrira zabaltzeko helburuarekin, asanblada irekiak deitu dituzue egitaraua antolatzeko. Zein izan da herriko gazteen erantzuna?
O.O.A: Joan den urtetik aurtengora salto hori egin dugu. Hau da, aurreko urtean ez genituen asanblada irekiak deitu, eta aurten bai. 2024ko balorazioa egin ostean, egunaren antolakuntza gazte asanbladatik haratago zabaltzeko ideia izan genuen. Beraz, bi asanblada ireki egin ditugu, eta hogei lagun inguru batu gara. Asanblada hauetan, batez ere, egitaraua lotzeaz arduratu gara, baita herriko eragileekin harremanak sendotzeaz ere. Herriko gazteei Gaztetxe Eguna antolatzeko aukera ematea izan da helburua.
Joan den urteko Gaztetxe Egunarekin alderatuz, desberdintasunekin dator aurtengoa, beraz.
M.B.P: Bai, aurtengoak baditu zenbait desberdintasun. Alde batetik, aurten, herrian presentzia gehiago izan nahi genuen, eta horretarako eguneko ekintza guztiak kalean gauzatuko ditugu. 2024an adibidez, bazkaria gaztetxean egin genuen, eta aurten, Beheko Plazan egingo dugu. Beste aldetik, lehen esan bezala, egunaren antolaketa zabaldu nahi izan dugu, eta horretarako, asanblada irekiak deitzeaz gain, Erraldoi eta Buruhandien Konpartsak, Bertso Eskolak eta norbanako desberdinek ere parte hartuko dute egitarauan. Aurtengo Gaztetxe Eguna herrira begirako egitasmoa dela esan genezake.
O.O.A: Gainera, azpimarratu nahi dugu ez dela soilik gazteei bideratutako eguna. Hau da, denok parte hartzea da helburua, ume, gazte zein nagusi.
M.B.P: Horrekin lotuta, azken 25 urteetan gazte asanbladan parte hartu duten kide guztiak ere gonbidatu nahi ditugu apirilaren 12ra.
Herriko gazteei Gaztetxe Eguna antolatzeko aukera ematea izan da gure helburua
Gazte asanbladaren proposamenaren aurrean, nolakoa izan da herriko eragile zein norbanakoen erantzuna?
M.B.P: Proposamena luzatu genien momentuan baiezkoa eman ziguten. Beraz, gure aldetik, eskerrak eman nahi dizkiegu Erraldoi eta Buruhandien Konpartsari eta Mutrikuko Bertso Eskolari, baita norbanako guztiei ere: asanbladetara etorri direnei, eguerdian trikitia joko dutenei, gaueko DJei… Garrantzitsua da guretzat horrelako egunetan, eta urte guztian zehar, herriko eragileekin hartu emana izatea. Gazte asanbladak horrelako espazioak eskaini behar dituela argi daukagu; beraz, pozik gaude egunarekin.
O.O.A: Oso eskertuta gaude. Gainera, parte hartze zabal honek egunari beste esanahi bat ematen dio. Beraz, pozik eta eskertuta gaude.
11:30ean emango diozue hasiera egunari, Mutrikuko Erraldoi eta Buruhandien Konpartsaren kalejirarekin, eta egun guztian zehar ibiliko zarete herriko kaleetan gora eta behera.
O.O.A: 11:30ean txupinazoarekin hasiko dugu eguna. Goika Plazan hasiko da Mutrikuko Erraldoi eta Buruhandien Konpartsen kalejira, eta ondoren, 13:00etan, Beheko Plazatik trikipoteoa hasiko da. 14:30ean herriko bertso eskolako lagunak arituko dira bertsotan, eta ostean, argazkia aterako dugu denok batera. 15:00etan hasiko da bazkaria Beheko Plazan, eta gero, zumba eta jolasak egongo dira. Arratsaldean ere jarraituko du festa giroak; izan ere, 18:30ean Txaranga a la Mutrikuarra hasiko da gaztetxetik, eta egunari amaiera emateko, herriko DJak egongo dira gaztetxean, 22:00etatik aurrera. DJ Urgozo, DJ KOl4k, DJ Ace eta DJ Laia Piper igoko dira oholtzara.
M.B.P: Bazkarian izena emateko sare sozialetan zabaldu dugun galdetegian edo herriko tabernetan dauden zerrendetan apuntatu beharko da. Nagusien menua 12 euro izango da, eta umeena 8 euro. Euria eginez gero, Egaña frontoian egingo dugu bazkaria, baina printzipioz, Beheko Plazan izango da.
Gazte asanbladatik, Gaztetxe Egunera eta gaztetxera hurbiltzeko zein mezu igorri nahi diozue herriko gazteriari?
M.B.P: Gaztetxe Egunean parte hartzeko deia egin nahi dugu, baita asteroko asanbladetara gerturatzekoa ere. Gaztetxea espazio irekia da edonorentzat. Beraz, herriko gazteak bertara animatu nahi ditugu. Gainera, nahiz eta gaztetxea gazte asanblada batek bideratu, eta gazteei begirako espazioa izan, ez dugu gazteengana mugatu nahi soilik. Beraz, argi utzi nahi dugu edonor dela ongi etorria. Horrez gain, azpimarratu nahi duguna zera da: herriko eragileren batek proposamenik izanez gero, irekita gaudela elkarlanerako. Izan ere, gaztetxea espazio egokia izan daiteke gainerako eragileentzat ere.
