1.800 kilo berdel banatu dituzte 28. Berdel Egunean
Eguraldi ona lagun, jende ugari erakarri du Mutrikuko Berdel Egunak. Zazpi pintxo dastatzeko aukera egon da portuan, berdel erreaz eta marmitakoaz gain; 20.000 pintxo inguru prestatu dituzte.
28. Berdel Egunean lanean aritu den boluntario taldeetako bat. Mutrikuarren egunik preziatuena ez bada, preziatuenetarikoa da Berdel Eguna. Aste guztiko lanaren ostean, gaur [apirilak 5] goizean goizerako lanean ari ziren hainbat herritar, berdela garbitu, prestatu, pintxoak egin eta beste hamaika lanetan. Gaurkoan, gainera, mutrikuarrek eguraldia ere lagun izan dute, eta zalantzarik gabe, asko eskertu dute batek baino gehiagok.
Guztira 1.800 kilo berdel erabili dituzte; horietatik 1.000 kilo, berdel errea egiteko izan dira. Marta Amonarriz Mutrikuko Turismo teknikariak azaldu duenez, aurtengo berdela “handia” izan da; hori horrela, 1.000 kilo horietatik 2.000 razio inguru eskaini dituzte. Pintxoak, ostera, 20.000 inguru izan dira. Herriko tabernari eta sukaldariek mimo handiz prestatutako zazpi errezetarekin: berdel entsalada epela (Zelaieta Jatetxea), berdel focaccia (Azkenetxe Ristorante), berdel txaka (Kai Gain elkartea), berdel entsaladilla ilarrekin (Urgain Jatetxea), berdelez osatutako koktela (Pikua jatetxea), berdel brick-a gazta freskoa eta porruekin (Valentin Zumalabe) eta Ortizen berdel eskabetxea patata entsaladarekin (Arno Batzokia). Urteroko legez, herritarrek horrenbeste gustuko duten marmitakoa ere egon da.Â
Berdel guztia prestatzen, ostera, Berdel Eguna horren berezi egiten duten boluntarioak aritu dira. Amonarrizek bereziki eskertu nahi izan du boluntarioen ana: “Laguntzeko jendea eskatu zen, eta oso erantzun ona izan du. Jende berria ere etorri da turismo bulegora izena ematera, eta astean zehar egin diren lanetarako, egia esan, jende nahikotxo etorri da. Udalak etorri diren boluntario guztiak eskertu nahi ditu, asko laguntzen dute eta ekitaldi hau ezingo litzateke beste era batera antolatu. Udalaren aldetik, eskertza infinitoa urtero egiten duten lanarengatik”.
Boluntarioetako bat izan da Ane Lezertua gaztea; haren laugarren urtea izan da aurtengoa. Mutrikuarrentzat xarma bereziko eguna dela aipatu du, eta gazteei laguntzera joateko deia egin die: “Datorren urtean jende gaztea ere etortzea ondo egongo litzateke, jendea behar da eta”. Arantza Ugarte, ostera, Berdel Eguna sortu zenetik, urtero joan da boluntario lana egitera: “Berdel Eguna hasi zenetik etorri naiz boluntario, urte asko dira. Herrian antolatzen den festa da, eta herria ezagutzera emateko toki ona. Gainera, berdela ez denez arrain oso estimatua izan, indartzeko aukera bat da, eta hori ere garrantzitsua da”. Hala, beste hamaika boluntario bezala, gaur 10:00etan joan da Ugarte lanera, eta pintxo dastaketa amaitu arte ariko da bertan.
Giroa pixkanaka joan bada berotzen ere, 13:00etan zabaldu behar zuten pintxo dastaketa aurreratu egin dute. “Guk pentsatzen genuena baino lehenago etorri da jendea, eta dena martxan geneukanez, lehenago hasi gara”, azaldu du Ugartek. Hala, ilara luzeak sortu dira 13:30erako, baina zenbaitentzat itxaronaldiak merezi izan du: “Ilara nahiko azkar joan da. Pintxoak eta berdel errea eskatu ditugu, eta sekulakoak daude”. Jana eta edana ez dira falta izan Berdel Egun borobil honetan.
Azoka eta kontzertua. Pintxo dastanketaren aurretik, baina, goiztiarrenek portuko lasaitasunaz gozatzeko aukera izan dute. Izan ere, egitekorik ez da falta izan. Besteak beste, Merkatu txikia eta sortzaile eta artisauen azokak hartu ditu portuko txoko guztiak; goiza poliki hasi bada ere, pintxo dastaketan bezala, eguerdia izan da eguneko unerik gorena.
Hutsik egiten ez duen Berdel Eguneko beste ekintzetako bat, herriko abesbatzen kontzertua da. Zabiel plazan elkartu dira abesbatzak, eta kantaldi ederra eskaini dute abeslariek. Herritarrek gogoz jo dituzte txaloak, abesti bakoitza amaitzearekin batera.
Eguna ez da pintxo dastaketarekin amaitu. Boluntarioak pozik, herritarrak pozik eta urrunagotik etorri direnak ere, pozik. Hala, alde batetik, 17:00etan Grabni binakako txapelketa ikusteko aukera egongo da Miruaitz Frontoian. Bestalde, portuan geratu nahi dutenek 19:00etan dute hitzordua: Lur Azpian eta Zutik erromeria ikusteko aukera egongo da.
