Markina-Xemeingo 59. Ibilaldi Neurtuak domekan bilduko ditu mendizaleak
Ibilbide luzea eta laburra egongo dira aukeran, eta izena emateak irteera ordua baino ordu erdi lehenago izango dira. Amaieran zozketa egingo dute.
Argazkia: Artibai mendigoizale elkartea. Mendizaleentzako urteroko hitzordu horietako batean bilduko dira Markina-Xemeinen domekan (apirilak 13). Badator beste behin ere Artibai Mendigoizale elkarteak urtero antolatzen duen Ibilbide Neurtua.
“Markina-Xemeini buelta ematea da martxa honen helburua, eta aurten Oiz ingurura joatea tokatzen da. Normalean, Oizera joaten garenean, Mendibiletik bueltatzen gara, baina aurten alderantziz egingo dugu ibilbidea, ohiko bidetik Trabakura doan jaitsiera bustita egonez gero arriskutsua izan daitekeelako, eta domekarako eguraldi iragarpenak ez direlako onenak”, azaldu dute Artibaikoek.
Aurtengoa, 59.a izango da, eta, ohi modura, bi ibilbide izango dituzte aukeran parte hartzaileek. “Denentzako ekitaldia egin gura dugu, eta horregatik prestatzen ditugu bi ibilbide. Luzea gogorra da, 29 kilometrokoa baita, eta desnibel askorekin. Ondorioz laburra ere egongo da aukeran”, gehitu dute.
Alde batetik, ibilbide luzea 29,5 kilometrokoa izango da, eta 1.472 metroko desnibela izango du. Parte hartzaileak 07:00etan abiatuko dira Opela okindegitik (Atxondoa, 4), eta ibilbidea zortzi ordu ingurukoa izatea aurreikusi dute antolatzaileek. Izan ere, hiru gailur igo beharko dituzte: Mendibil (613 metro) eta Zengotitagane (818 metro) eta Oiz (1.026 metro).
Markina-Xemeinen hasiko dira, eta Iturretarantz joango dira, handik Mendibil igotzeko. Gero, Donagarai eta Trabakua zeharkatuko dituzte, Zengotitaganetik Oizera joateko. Hain zuzen ere, bi tontorren artean, Iturzuriko mendi aterpean anoa postua izango dute. Oiztik Kortaguren, Gontzugarai, Zeinke-Ziarregi, Ikaztei zeharkatu eta Kareaga industrialdera ailegatuko dira, gero, herrigunera joateko.
Bestalde, ibilbide laburra egin gura dutenek 9,7 kilometroko bidea izango dute, goranzko 387 metroko desnibelagaz. Lehenengo zatia, Trabakuarainokoa autobusez egingo dute, beraz, 09:30ean jarri dute hitzordua bus geltokian. Oinez, Danagarain hasiko dira (Trabakua ondoan), 10:00ak inguruan. Handik Mendibilera joango dira, eta gero, Iturreta, Laitxu eta Iparragirre zeharkatuta bueltatuko dira Markina-Xemeinera.
Eguraldiak zeresan handia izango du parte hartzaile kopuruan, baina antolatzaileek herritarrei bertaratzeko deia egin diete. Iaz 200 mendizale elkartu zituen martxak, eta aurten antzeko kopuruetan ibiltzea espero dute, betiere eguraldiaren arabera. “Erantzun ona edukitzen duen martxa da”.
Hala, gogoratu dute izena ematea egunean bertan egin behar dela, irteera baino ordu erdi lehenago. Ez da ezer ordaindu behar, gainera. Ibilbidea, ohi bezala, seinaleztatuta egongo da, eta amaieran bertoko produktuen zozketa egingo dute.
