Dantza erakustaldiz bete dute Ondarroa
Dantzarte elkarteak antolatuta, XVII. Ondarroako Barra eta Dantza Kalean ospatu dute gaur [apirilak 12]. “Keinuen bidez hitzez bezainbeste esan daitekeela” aldarrikatzen dute Dantzarteko kideek, eta dantzen bitartez, gaur ere esateko zein erakusteko asko daukatela argi utzi dute. 200 bat dantzari elkartu ditu hitzordu bereziak.
Apirilaren 29a da Dantzaren Nazioarteko Eguna, eta Lea-Artibaiko dantzariek ospakizunak aurreratu dituzte aurten. Ondarroako, Mutrikuko, Berriatuko, Markina-Xemeingo, Aulestiko eta Lekeitioko 54 dantzari aritu dira barra txiki, ertain eta handiko saioan. Beste urte batez, dantza ikastorduetan egindako lan handia kalera atera dute. 7-10 urte bitarteko umeena izan da lehendabiziko erakustaldia. Jarraian, barra ertainean, 11-13 urte bitartekoak aritu dira, eta azken saioa gazte eta helduek osatu dute.
Antolatzaileek gogoratu bezala, balleteko ariketak barandan egiteko ideia Gipuzkoako Dantzari Profesionalen Elkartearena da. Haiek hasi ziren Donostiako Kontxako barandan egiten, eta gaur egun, bertan ez ezik, hainbat hiri eta herritan egiten da. Aurreko asteburuan egin zuten Kontxako erakustaldia, eta eskualdeko dantzariak ere bertan izan ziren.
Dantza klasikoaren ondoren, dantza modernoagoen txanda izan da. 152 dantzari bildu ditu aurtengo Dantza Kalean egitasmoak. Hip-hop, dantza klasikoa, dantza garaikidea eta funky estiloetako hamazortzi koreografia eskaini dituzte, Alamedan.
Argazkiak: Dantzarte/HITZA
