Arizti, Bedialauneta eta Masbouh, Ziriako Andonegi Mikroipuin lehiaketako irabazleak
Lehiaketaren 8. aldian guztira 99 lan jaso dituzte, hau da, iaz baino hamar lan gehiago.
Sari banaketa.Mutrikuko Udala 8. Ziriako Andonegi Mikroipuin lehiaketak baditu irabazleak. Helduen mailan, Maitane Arizti Ugarteburu gasteiztarrak irabazi du 500 euroko saria ‘Emma Montag’ lanagaz. Gazteen kategorian, berriz, Laura Bedialauneta Legarda mutrikuarrak irabazi du 200 euroko saria ‘Itsasoko kolpea’ izeneko ipuinari esker. Azkenik, mutrikuar onenaren saria, 200 eurokoa baita ere, Ayate Masbouhk jaso du ‘Nire anaia’ lanarekin.
48 pertsonek parte hartu dute aurten lehiaketan, horietako 26 mutrikuarrak izanik. 20 partaide gazteen mailan, 15 mutrikuar, eta 28 heldu, 11 mutrikuar. Hau da, iazko parte hartzaile kopuru berdina izan da, baina lanetan igoera egon da. Guztira 99 lan aurkeztu dituzte, iaz baino hamar lan gehiago.
Antolatzaileek nabarmendu dute gazteen artean egondako “maila altua”, are gehiago kontuan hartuta gehienak mutrikuarrak izan direla. Horrez gain, helduen artean herritarren parte hartzea azpimarratu dute, iaz hiru izan zirelako bakarrik. Epaimahaikideek, berriz, adierazi dute “lan ederrak” aurkeztu direla eta erabakiak hartzea “asko kostatu” zaiela.
