1937ko bonbardaketak oroitzeko memoria jardunaldiak egingo dituzte Markina-Xemeinen
Markina, Xemein, Etxebarria, Munitibar eta Gernikako bonbardaketak izango dituzte gogoan. Apirilaren 25ean 'Gernika: laborategi esperimentala' unitate didaktikoa aurkeztuko dute, eta apirilaren 26an, 'Euzkadi en ruinas' liburuaren aurkezpena eta 'Llach: la revolta permanent' dokumentalaren emanaldia eskainiko dituzte.
Apirilaren 25ean Markina, Xemein eta Etxebarriako eta apirilaren 26an Munitibar eta Gernikako bonbardaketaren 88. urteurrena izango da. Horren harira, egitarau osatua antolatu du Markina-Xemeingo Ahaztuen Oroimena taldeak, Martxoak 3 Elkartearen, Gernika Memoriaren Lekukoren eta Markina-Xemeingo Udalaren elkarlanagaz.
Hala, memoria jardunaldiak egingo dituzte bi egun horietan, apirilaren 25 eta 26an. Alde batetik, apirilaren 25ean, 18:00etan, Gernika: laborategi esperimentala unitate didaktikoa aurkeztuko dute: “Memoria, pentsamendu kritikoa eta sormena lantzeko unitate didaktikoa izango da”. Gernika Memoriaren Lekuko elkarteko kideak eta Sabin Ibazeta Lertxundi izango dira hizlariak. Markina-Xemeingo udaletxeko osoko bilkura aretoan ipini dute hitzordua.
Apirilaren 26an, ostera, goiz eta arratsalde egingo dituzte saioak. 36ko gerra hizpide hartuta, 12:00etan Euzkadi en ruinas. Arqueologia de la Guerra Civil en el Pais Vaso (1936-1948) liburuaren aurkezpena egingo dute, osoko bilkura aretoan. Bertan egongo da liburuaren idazle Josu Santamarina Otaola ere: “Gerra Zibilaren arkeologian oinarritutako liburua da. Markinaldean egindako lanak aipatzen dira”. 18:00etan, aldiz, Esperantza Aretoan elkartuko dira Llach: La revolta permanent dokumenatalaren emanaldia ikusteko: “Lluis Llachen Campanades a morts abestia hizpide, 1976ko martxoaren 3ko Gasteizko gertakariak gogoratzen ditu dokumentalak”. Ondoren solasaldia emango du Martxoak 3 Elkarteko Julen Diaz de Argote historialariak.
