Lekeitioko dendek bat egin dute Aspanovasen Ausartak kanpainagaz
30 denda baino gehiago dira itsulapiko solidarioa izango dutenak. Ekainaren 14an Ausarta Eguna ospatuko dute Lekeition.
Iazko Ausarta Eguna, BilbonAspanovas Elkartasuna eratzen hasi da Lekeition. Herriko 30 dendek baino gehiagok bat egin dute Aspanovas Elkarteak zuzenduriko Ausartak itsulapiko solidarioen kanpainagaz. Hain zuzen ere, ekainaren 14an herrian bertan ospatuko den Ausarta Egunerako lehen pausoa da. Aspanovasek haur minbizidunen familiei laguntzeko antolatu duen elkartasuna eguna da.
Egun horretara begira, eta orokorrean elkartearen alde, dirua biltzeko kanpaina da. Lekeitioko denda askotan itsulapiko bat jarri dute ekainaren 14ra arte diruz bete ahalko dutena herritarrek. Hau da, dendak diru bilketarako gune bihurtu dituzte, lekeitiarrek eguneroko erosketak egiten dituzten bitartean kanpainari laguntzeko aukera izan dezaten.
“Keinu sinboliko baina indartsu horrekin, tokiko merkataritzak komunitatearekiko konpromisoa erakusten du, eta adin guztietako pertsonak kausa komun baten inguruan batzen dituen sare solidario baten eragile bihurtzen da”, esan dute Aspanovasetik.
Itsulapiko kanpainaren bidez eta Ausarta Egunean bildutako diru guztia Aspanovasen Arreta Integralerako Espazio berrira bideratuko dute. Baliabide horrek minbizia duten adingabeei eta haien familiei “laguntza fisikoa, emozionala eta soziala” eskainiko die. Zentro hau “benetako eta premiazko” behar bati erantzuteko sortu dute: “Harrera egiteko leku bat izatea, eta diagnostikoa jasotzen duenari ez ezik, familia osoari ere eragiten dion prozesu batean zehar zaintzea”.
Ausarta Eguna, ekainaren 14an
Ekainaren 14an Lekeitio elkargune bat bilakatu nahi dute, “alaitasuna eta hausnarketa koletiboa” uztartuko dituen eguna izango da. Egunean zehar, enpatia eta sorena sustatzeko tailerrak egingo dituzte, baita jarduera ludikoak eta jolasak ere, eta ez dira puzgarriak, ikuskizunak eta kontzertuak faltako. “Haurren minbiziaren errealitatea eta Aspanovasek duela hiru hamarkada baino gehiagotik egiten duen lana hurbilagotik ezagutzeko topaguneak izango dira”.
Bai Ausarta kanpainan baita Ausarta Egunean ere herritarren inplikazioa eta laguntza “funtsezkoa” izango direla diote Aspanovasetik eta horregatik dei egin diete lekeitiarrei parte hartzera: Ausarta Eguna esperientzia ahaztezina izatea nahi dugu, elkartasunez, itxaropenez eta konpromisoz betea. Atzerako kontaketa hasi da. Komunitate bat elkartzen denean, dena posible dela erakusteko aukera berri bat da”.
