Txikitasunetik, herria izateko pausoak emanez
Gure Esku herri mugimendu herritarrak ekainaren 7rako deitu du mobilizazio nazionala, Bilbon. Domekan [ekainak 1], berriz, Deiadarra ekimena egingo dute, mobilizazio hori iragartzeko helburuagaz. Lea-Artibaiko Gure Eskuko kideek nabarmendu dute "kaleak berriro aktibatzeko beharra dagoela".
Lekeitioko Eli Zubiaga San Jose eta Etxebarriko Asun Arrieta Maguregi Deiadar mendiak tontorretan sua piztuz edo adar soinuz seinaleak eginez Bizkaiko Batzar Nagusietara joateko deia egiten zuten bost mendiak dira Kolitza, Ganekogorta, Gorbeia, Oiz eta Sollube. Hain zuzen, lurralde historiko osoan zehar ikus zitezkeen mendiak. Herri Libre bat aldarrikatzeko mobilizazio nazionala deitu du Gure Eskuk ekainaren 7rako, Bilbon, eta, beste batzuetan egin bezala, deiadarren bidez egingo dute deialdia, domekan [ekainak 1]. Bertan izango dira, besteak beste, Lekeitioko Eli Zubiaga San Jose eta Etxebarriko Asun Arrieta Maguregi.
Lea-Artibaiko herritarrak Oizen elkartuko dira. Lea-Artibaiko herritarrak, berriz, Zengotitatik aterako dira 10:00etan. Hala ere, Gure Eskuko kideek autoz edo autobusez joateko aukera ere badagoela gogoratu dute. Ekitaldi politikoak eta adar-jotzea “aldi berean” egingo dituzte bost tonterretan: 12:00etan.
Gure Eskuk “estrategia bat” duela gogoratu dute, helburu duen Herri Libre Bat aldarrikapena aurrera eramateko “edozein momentu ona” dela zehaztuz. Urteetan egon ez den egoera bat dela uste dute, “baliatu behar dena”. Alde horretatik, herritarrak “egoera soziopolitiko onaz” kontzientzia pizteko unea dela nabarmendu dute: “Batzuetan herria hainbeste borroketan murgilduta, lokartuta dago, baina gurea borroka fundamentala dela uste dugu, denengan baitu eragina”.
Bat datozen “ahalik eta elementu gehienak” elkartzea bilatu dute: sindikatuak, mugimendu sozialak, alderdi politikoak… “Denekin hitz egin da eta denei egin zaie lekua”. Izan ere, une politiko “berezia” dela aitortu dute, Eusko Legebiltzarrean “gehiengo soberanista handia” dagoelako: “Baldintza errealak egon daitezke estatu politiko berri bat adostu ahal izateko”. Azken hitza herritarrek izan behar dutela aldarrikatzen dute, hau da, galdeketa egitea. Hain zuzen ere, errefendumaren aukera sartu behar dela uste dute.
“Sare sozialez beteta gaude, eta lehen, kaleak ziren herritarren sare sozialak. Kaleko indar hori ez da desagertu, aldatu egin da”
“Herriari galdetu behar zaio zer nahi duen bere etorkizunerako, baina egunerokotasunean herri egiten gaituen bestelako hainbat gai daude. Herriak erabaki behar du zer nahi duen pentsio, euskara edota hezkuntza, adibidez”. Ekainaren 7koa “borroka askotarako mobilizazioa” dela aldarrikatu nahi dute.
Erabaki nahi duen herria
Argazki orokor bat atera nahi dute. Munduari ere erakutsi nahi diote, beste behin, badagoela herri bat erabaki nahi duena. Eskoziako adibidea ekarri dute gogora. 2014ko giza katetik indar apur bat galdu arren, kate hori ez eteteko, borrokan jarraitzearen garrantzia azpimarratu dute. Lea-Artibain, esate baterako, indar handia izan zuen bere momentuan, baina orain taldeak Lekeition, Ondarroan eta Etxebarrian daude bakarrik: “Hori bai, eskualdean gehiengo abertzalea dago, eta hautetsontziekin mugimendu oso indartsua sortu zen”. Laurak bat datoz auzia “kaxoi batean geratu” zela eta kaleak “berriro aktibatzeko beharra” dagoela esatean.
“Oso kezkagarria” den faktore bat ere badagoela uste dute: faktore komunikatiboa. “Sare sozialez beteta gaude, eta lehen, kaleak ziren herritarren sare sozialak. Kaleko indar hori ez da desagertu, aldatu egin da. Horrek ez du esan nahi jende hori ideologikoki aldatu denik, baina sare sozialek gizartea desmobilizatu dute”.
Gure Eskuk Lekeition egindako aurkezpena.Lekeitioko Gure Esku.
Euskal Herriaren erronka handiena “Euskal Herria izatea” dela onartu dute: “Izan nahi dugu, baina ez gara. Nahia da, mugatzen diguten nahia”. Erronka errealitate bihurtzeko bidean, Gure Eskuk “akuilu” izan behar du, eta ildo horretan, herri mailan “indar gehiago” behar dute: “Euskal Herriari erabakitzeko eskubidea falta zaio, gauza asko inposatzen dizkigute, eta ez dugu mugitzeko aukerarik”.
Burujabetza da Gure Eskukoek nabarmentzen duten hitz gakoetako bat, eta egoerak “frustrazio etengabea” sortzen duela aitortu dute, eskumenak bakarrik ez, ahalmenak ere behar dituztela azpimarratuz. Horregatik, herri aktibazioa “beharrezkotzat” jo dute, batez ere hauteskunderik gabeko ziklo bat datorrelako. Testuinguru horretan, mobilizazioak “ilusioa” berriro piztuko duelakoan daude.
“Demokrazia mugatua”
“Gu ale bat gara, europar demokrazia batean; demokraziaren legea erabakitzeko askatasuna da, eta guk ez daukagu. Demokrazia hitza da, baina erabilera ez da egokia: demokrazia mugatua da”, adierazi dute. Egoera horretan, gizarteak erabaki ahal duen horretatik eragin dezakeela uste dute. “Guk erabaki behar dugu zer egin nahi dugun: etxean geratu, bat egin edo gure herriaren aldarrikapena egin”.
Hala, herritarrei ekainaren 7an Bilbora bertaratzeko deia egin diete: “Guk egin behar dugu, inork ez du guregatik egingo. Gure esku dago gure txikitasunetik herria izateko pausoak ematea”. Ekaineko bi hitzordu nagusien atarian, herritarren hausnarketarako galdera bat jaurti dute: ‘Non nahi duzu zure etorkizuna erabakitzea?’. Beraien erantzuna argi dute: “Gure Eskutik guk eta hemen erabakitzea nahi dugu, guk dakizkigukako zeintzuk diren gure egunerokotasuneko erronka garrantzitsuenak”.
