42. Umeen Euskal Jaia ospatuko dute zapatuan, Mutrikun
Zarauzko Dantza Taldeko eta Mutrikuko Gure Ametsa dantza taldeko umeak elkartuko dira zapatuan; guztira, 140 lagun ingurun.
42. Umeen Euskal jaia antolatu du zapaturako [ekainak 7] Gure Ametsa Dantza Taldeak. Aurtengoa gainera, “berezia” izango dela zehaztu dute; izan ere, dantza taldearen 60. urteurrena ospatzen dabiltzanez, aurtengo Umeen Euskal jaian frontoian batuko dira guztiak bazkaltzeko. Zarauzko Dantza taldekoak joango dira Mutrikura; guztira, 140 lagun inguru elkartuko dira.
10:30ean Albokako plazan batuko dira dantzari txiki guztiak, eta 11:30ean kalejirari hasiera emango diote. 13:00etan hasiko da Alardea Goiko plazan, eta guztiak bazkaltzeko batu ostean, 17:00etan Beheko plazan egongo den erromeriarekin emango diote amaiera egunari. “60. urteurrena ospatzeko asmoz, Gure Ametsa Dantza Taldetik zerbait berezia egitea erabaki dugu: egun horretan parte hartuko duten ume dantzari guztiek elkarrekin Egaña frontoian bazkalduko dugu”.
Aurten, gainera, dantza taldeko kamisetak ere egin dituzte, eta bi modu zehaztu dituzte eskaera egiteko: online edo presentzial. “Online eskatzeko galdetegia zabaldu dugu sare sozialetatik, eta eskaria modu pertsonalean egiteko, zapatu goizean [ekainak 7] Goiko plazan egongo gara, eta arratsaldean, Beheko plazan. Domeka goizean [ekainak 8], berriz, Beheko plazan egongo gara. Eskaera egiteko azken eguna ekainaren 8a izango da, eta kamisetak iristen direnean mezu bat bidaliko zaie eta ordainketa eskudirutan egin beharko da”.
“Gure Ametsa Dantza taldearen izenean eskerrak eman nahi dizkiogu Maitane Andonegiri, bera izan baita gure kamiseten diseinuaren sortzailea. Eskerrik asko bihotzez, Maitane!”.
