Jai Alai Ligaren hurrengo geldialdia Markina-Xemein izango da
Txapelketa ekainaren 13an hasi eta Karmen jaietan amaituko da. Aurretik, zapatuan eta domekan [ekainak 7 eta 8] Series kanporaketak jokatuko dituzte hainbat puntistek, Uni frontoian; tartean egongo dira Atain eta Zelaia etxeko puntistak.
Bilboko Iron Cup-a jokatu berritan eta zesta puntako Nazioen Ligaren erdian, urteroko hitzordu garrantzitsua dute zesta zaleek Markina-Xemeinen. Izan ere, Jai Alai Ligarren hurrengo geltokia Uni frontoia izango da, Markina-Xemeingo Grand Slam txapelketa jokatzeko. Txapelketa ekainaren 13an hasiko den arren, asteburuan Series kanporaketak jokatuko dituzte hainbat pilotarik.
Alde batetik, “errotazioa” egiten ari diren puntista profesionalek jokatuko dituzte Series kanporaketak. Bestetik, herriko bi gaztek “maila horretan jokatzeko aukera” izango dute. Hala, Martin Ormaetxea Zelaia eta Gorka Mugartegi Atain izango dira etxeko pilotariak, “belaunaldi berriko bi izen nabarmenenak”. Zelaia-k Iron Cupeko txapela eskuratu duen Gorka Sorozabalekin osatuko du bikotea, eta Atain-ek, ostera, Xabi Barandika Markina-Xemeingo egungo txapelduna eta Iron Cupeko azpitxapeldunarekin.
Jai Alai Ligarako puntuagarria den Euskaraz Master Seriesa jokatu du Zelaia-k aurten, Olabe pilotalekuan “maila ona” erakutsiz. Atain-ek ere, ibilbide oparoa dauka zestan: “Goikoetxearekin jokatu zuen duela bi urteko Markina-Xemeingo Grand Slama, iaz aurre kanporaketako finala galdu zuen etxean eta Bilboko Iron Cup-ean ere ordezko moduan jokatzeko aukera izan zuen, Lekerikaren lesioagatik”.
Hori horrela, zapatuan [ekainak 7] 12:00etan jokatuko dituzte Series kanporaketako finalerdiak. Alde batetik Barandika eta Atain ariko dira Olharanen eta Del Rioren aurka, eta bestetik, Urreisti eta Basque ariko dira Zelaiaren eta Gorkaren aurka. Partida bakoitzeko bikote irabazleak hurrengo egunean [ekainak 8] jokatuko du Series-eko finala, 18:00etan. Kanporaketako bi partidetarako ez da sarrerarik beharko
Serieseko bikote txapeldunek beste bost puntisten aurka lehiatu beharko dute Markina-Xemein Grand Slam txapelketan. Martitzenean [ekainak 10] aurkeztuko dituzte nortzuk izango diren beste bikoteak, eta ekainaren 13ean emango diote hasiera ofiziala txapelketari. Bonoak salgai ipini dituzte www.eramanjaialai.com web orrian; egunez eguneko sarrerak aurkezpenaren ostean ipiniko dituzte salgai.
