“Erabateko arrakasta” izan dira Warhammer Lekeitiok antolatutako ekintzak
Zapatuko [ekainak 7] txapelketan 24 jokalarik parte hartu zuten eta domekako [ekainak 8] tailerrean ume asko elkartu ziren
Umeak tailerreanWarhammer Lekeitio Warhammer mugimendua Lekeition errotzen bakarrik ez, hazten doa pixkanaka. Warhammer Lekeitio taldeak horretarako egiten du lan, eta mundu horretan murgiltzeko ekimenak egin ditu asteburuan. Zapatuan [ekainak 7] 24 jokalarik parte hartu zuten Lekeitioko IV. Warhammer txapelketan. Maila onaz gain, batez ere egun guztian zehar bertaratu ziren herritar guztiengan jarri dute arreta. “Egia esan mugimendu handia egon zen, urtetik urtera handitzen doana. Interesa pizten duen jokoa da, ikusgarria, arreta deitzen duen horietakoa”.
Domekan [ekainak 8], lehiaketa alde batera utzi eta tailerra antolatu zuten. Hitzordua 11:30ean jarri bazuten ere, 11:00etan azken ukituak prestatzeko kultur etxera hurbildu zirenean dagoeneko ume asko zituzten zain. Bertan, txikienek margozteko aukeraz gain, partida laburrak jokatzeko aukera izan zuten eta piezen erakusketa bat jarri zuten eta guzti. Hasiera batean 10-15 ume espero bazituzten ere, azkenean 40 ume inguru elkartu ziren goizean eta eraman zuten material guztia agortu zuten.
Antolatzaileak eta umeak bakarrik ez, gurasoak ere “pozik” zeudela azpimarratu dute: “Esaten ziguten gaur egungo umeei asko kostatzen zaiela pantailetan ez den zerbaitetan arreta mantentzea denbora luzez eta tailerrean adi eta gustora egon zirela zioten”. Hau da, interesa piztu zuen txikiengan. Alde horretatik, urterik urtera Warhammer mundua gero eta gehiago zabaltzen ari dela diote eta jokoaren inguruko filmak ateratzen dituztenean aurrerapauso nabarmena egongo dela aurreratu dute.
Momentuz, Lekeition bertan hazten doan dinamika da eta hurrengo urtera begira ostera ere txapelketa eta tailerra antolatzeko “gogotsu” agertu dira antolatzaileak. Hain zuzen ere, belaunaldi berriei zabaltzeko intentzioa dute eta horretarako lan egingo dutela aurreratu dute.
