Markina-Xemeingo Grand Slamak udako denboraldia zabalduko du
Barikuan [ekainak 13] hasiko da txapelketa eta uztailaren 13ra arte luzatuko da, Karmen Egunean jaialdi berezia antolatuko dute. Bertan jokatzeko neskek kinielak jokatuko dituzte.
Batzuentzat uda oporrak hartzeko garaia izaten ohi da, baina puntistentzat kontrakoa, partida gehien izaten dituzten sasoia da. Herriko jaiekin batera antolatzen dira txapelketa eta jaialdi asko, Hegoaldean zein Iparraldean. Markina-Xemeingo Grand Slamak zabalduko du zesta-puntako udako denboraldia. Barikuan [ekainak 13] hasiko da eta uztailaren 13ra arte luzatuko da. Horrez gain, herriko Karmen Egun handian jaialdi berezia antolatuko dute. Gaur [ekainak 10] egin dute aurkezpena.
Frontoi berezia da Markina-Xemeingo Uni frontoia, zerbaitengatik da pilotaren unibertsitatea. Onenak izan nahi dutenak jokatzen dute bertan, beste pauso bat eman nahi dutenak. Horregatik, esperientzia eta gaztetasuna uztartzen dira bikoteetan. A multzoa “oso gogorra” dela nabarmendu dute denek ala denak: Erkiaga-Ibarluzea, Ladutxe-Lekerika eta Urreisti-Basque. “Txapela irabazteko guztien aurka jokatu eta irabazi beharra dago”, dio ispastertarrak. B multzoan daude Goitia-Lopez, Goixerri-Manci eta Johan-Zabala.
Hau da, hiru markina-xemeindar eta beste horrenbeste mutrikuar arituko dira. Goitia duela aste gutxi batzuk itzuli da Estatu Batuetatik eta oraindik bertoko frontoietara egokitzen ari da, “nahi baino entsegu gutxiago” egin ahal izan dituelako. Hala ere, gutxik ezagutzen dute berak baino hobeto Uni. Horrez gain, Lopez bezalako atzelari batekin jokatzeak “konfiantza” ematen dio, “atzelaririk onena da”.
Konfiantza izan da Ekaitz Mendizabal Goixerrik nabarmendu duen beste hitzetako bat. Kasu honetan, Mikel Manci bikote eta lagunarekin duena. Bigarren aldiz ariko da Euskal Herrian Bilbon jokatu ostean. “Oso pozik” agertu da mutrikuarren bikotea osatzeagatik: “Kuadrila berekoak gara, txikitatik ezagutzen gara, oso ondo elkar ulertzen gara eta berezia izango da zalantza barik”.
Aurkezpeneko markina-xemeindarrak
Unai Lekerikak txapelketa “orekatua eta gogorra” ikusten badu ere, Erkiaga eta Ibarluzea jarri ditu hautagai nagusi bezala. “Ibarluzeak ondo ezagutzen duen frontoia da eta Erkiagak edozeinetan jokatzen du ondo”. Hain zuzen ere, gernika-lumotarra eta ispastertarra, oraindik Euskal Selekzioko aje emozionalagaz, udako denboraldiari hasteko prest daude: “Jai Alaikoa oso berezia izan zen, baina orain egunerokotasunean oinarritu behar gara, udan partidak izan ahal ditugu ia egunero eta jokatzeko prest egon behar gara”. Elkarren aurka jokatuko dute barikuan [ekainak 13] eta lehen partidaren garrantzia azpimarratu dute, batez ere A multzo gogor horretan.
Barandika, kanpoan
Xabi Barandika Markina-Xemeingo Grand Slameko azken bi urteetako irabazleak ezingo du txapela errepikatu. Sailkapen kanporaketak jokatu behar izan zituen asteburuan Gorka Mugartegi Atainegaz batera, eta domekan, Eñaut Urreisti eta Thibault Basqueren aurka galdu zuten 2-1. Horrenbestez, azken bi horiek sailkatu dira Grand Slamerako. Finalerdietan, Martin Ormaetxea Zelaia markina-xemeindar gaztea eta Gorka Sorozabal hutsi zituzten kanpoan, eta gernika-lumotarrak eta markina-xemeindarrak Jean Olharan eta Julen Del Rio.
Formatu aldaketa
Emakumezkoek ere haien plaza izango dute Unin, bestelako formatu batean oraingoan. Kinielak jokatuko dituzte uztailaren 13an, gizonezkoen finalen egunean. Lau bikote ariko dira nor baino nor gehiago, eta hemen ere etxekoak dira protagonista: Erika-Oaia, Helena-Arai, Lur-Maia eta Maite-Alize. Ordubetez jokatuko dute eta bi bikote onenek Karmen Eguneko jaialdi berezian jokatuko dute. Punstitak “pozik” agertu dira formatu aldaketarekin, “zerbait desberdina” delako, ohiko finalerdietatik aldendu eta guztiek elkarren aurka jokatuko dutelako.
Gran Slamerako bonoak duela egun batzuk jarri zituzten salgai 75 eurotan eta orain eguneko sarrerak jarri dituzte eskuragarri, baita finaleko eta Karmen Egunekoak ere. Eraman Jai Alairen webgunean erosi daitezke.
Markina-Xemeingo Grand Slameko egutegia:
- Ekainak 13, barikua, 19:00etan
JOHAN-ZABALA vs GOIXERRI-MANCI
ERKIAGA-IBARLUZEA vs LADUTXE-LEKERIKA - Ekainak 20, barikua, 19:00etan
URREISTI-BASQUE vs A multzoko irabazleak
GOITIA-LOPEZ vs B multzoko irabazleak - Ekainak 27, barikua, 19:00etan
URREISTI-BASQUE vs A multzoko galtzailea
GOITIA-LOPEZ vs B multzoko galtzaileak - Uztailak 4, barikua, 19:00etan
FINALERDIAK - Uztailak 13, domeka, 18:00etan
Emakumeen kiniela
GRAND SLAM FINALA - Uztailak 16, Karmen Eguna, 18:00etan
JAIALDI BEREZIA (emakumeak + gizonak)
