Lea-Artibaiko olatua ETE Ligan: Ondarroa eta Isuntza, nor bere bidean gora
Eskualdeko bi talde, ibilbide desberdinetan baina helburu argiekin: Ondarroa podiumaren atarian eta Isuntza proiektu berri baten ilusioan.
Argazkia: Isuntza AE. Ez dira talde berriak, baina bai egoera berrian dabiltzanak. Ondarroa eta Isuntza, Kantauri itsasoko uretan hainbat urtez lehiatzen ari diren bi herri, emakumezkoen ETE Ligako estropadetan buru-belarri ari dira. Ligako sailkapenean bata bestearen atzetik dabiltza (Ondarroa 5., Isuntza 6.), baina biek ala biek begia etorkizunera begira dute: batak podiuma du amets, besteak berriz bigarren txandara jauzia ematea.
Ondarroa: txapeldun izatetik podiumaren bila. 2019az geroztik ETE Ligan lehiatzen dabilen Ondarroako traineruak jauzi bat egin du aurten. Aspaldi ez bezala, negutik taldea osatuta izan dute, eta hori nabaritzen ari dira. “Beste urte batzuetan zaila izan da jende nahikoa izatea, baina aurten hasieratik izan dugu talde sendo bat, azaldu du Eneko Azkarate entrenatzaileak. Eta emaitzak hor daude: Bizkaiko txapeldunak dira, eta orain ligako podiuma dute helburu.
Sailkapen orokorrean Kaiku da hirugarren (Ondarroa baino 6 puntu gehiago), baina Bizkaiko txapelketan ondarrutarrek gain hartu zieten. Aukera badute, beraz. Hala ere, Deusto (4. postuan) bi puntura dute, eta horien gainetik jartzea da lehen helburua.
Halere, ez da dena erraza izan. “Estropada bakoitzean akats txikiren bat egin dugu, eta horrek puntuak galduarazi dizkigu”, dio entrenatzaileak. Portugaleteko azken jardunaldia adibide garbia da: kalerik txarrena egokitu zitzaien, eta horrek emaitzan eragin zuzena izan zuen.
Aste honetako estropada ere antzeko ingurunean izango da. Ondarrutarrek argi dute: “Eremua ezagututa, hasieratik buru-belarri joan behar dugu. Kalearen loteria aldekoan izan edo ez, gure onena eman behar dugu”.
Isuntza: belaunaldi berria olatuan gora. Eta Isuntza? Bada, Isuntzako arraunlariak dira aurtengo ETE Ligako istorio politenetako baten protagonistak. 2021az geroztik ez zuten ligan lehiatzen, baina aurten, belaunaldi berria eta kanpoko laguntza batzuekin, itsasora bueltatu dira. “Azken momentuan osatu genuen taldea, eta arraunlarien gehiengoa jubenilak dira”, dio Peter Zendoia entrenatzaileak.
18 arraunlari dira guztira, eta horietatik soilik hiruk zuten esperientzia traineruan. Gainerakoek harrobiko batel eta traineriletan hartu dute eskarmentua, eta gainontzeko hutsuneak Mutrikuko, Portugaleteko, Santurtziko eta Elantxobeko arraunlariekin osatu dituzte.
Hasi berrien ilusioz, lehen jardunaldietan emaitza txukunak lortu dituzte: lehen asteburuan 8. izan ziren, eta bigarrenean 6. eta 5. postuak lortu zituzten, hots, euren aurreikuspenak gaindituz. “Jakina ez dela erreala, baina pozik gaude. Eta batez ere, motibazioz beteta gaude”.
Helburua? Presiorik gabe, baina argi: azken txandako buru izatea, eta ahal bada, epe ertain batean erdiko tandara salto egitea.
Asteburuko estropadak: kaleen garrantzia eta ausardiaz betetako uretaratzeak. Ondarroa eta Isuntza ez dira faborito nagusiak, baina bai ETE Ligari kolorea ematen dioten taldeak. Ondarrutarrek gogo biziz jarraituko dute podiumaren bila, eta lekeitiarrek, berriz, proiektua sendotzen eta gazteek esperientzia pilatzen.
Asteburu honetan Sestaon eta Zumaian jokatuko dituzte hurrengo estropadak. Kaleen aukeraketa eta estropada bakoitzeko ñabardurak kontuan hartuta, ezin da aurreikuspen zehatzik egin. Baina talde bien helburuak argi daude: Ondarroak puntuak pilatu nahi ditu Kaiku harrapatzeko, eta Isuntzak bere bidea egiten jarraitu nahi du, presarik gabe baina ilusioz gainezka.
Ez da itsasoa beti bare, baina arraunlari hauek badakite olatuaren gainean nola eutsi: batzuetan garaipenaren bila, besteetan etorkizuna eraikitzeko.
