Peruko kultura eta ospakizuna: Tupay elkartearen festa arrakastatsua Ondarroan
Peruko Independentziaren 204. urteurrena ospatu zuten larunbatean, giro eder eta parte-hartzailearekin.
Argazkia: Asociación Peruana Tupay Tupay elkarte peruarrak antolatuta, larunbat honetan Peruko Independentziaren 204. urteurrena ospatu zen Ondarroako Itsasaurre parkean. Goizeko 11:00etan hasi eta gauerdira arte luzatu zen ospakizunak herritarren eta bisitarien harrera beroa izan zuen.
Ekitaldiaren barruan, 25 postu bildu zituen ekintzaile eta saltzaileen azoka antolatu zuten: janaria, edaria, kamisetak, bitxiak eta oroigarriak saltzen ziren, besteak beste. Parte-hartzaileen artean, Ondarroako postuak ez ezik, Bilboko hainbat txokotatik etorritakoak ere izan ziren. “Giroa oso polita izan zen; jende asko hurbildu zen ez bakarrik inguruko herrietatik, baita Burgos, Santander, Iruñea edo Donostiatik ere”, adierazi dute antolatzaileek.
Jaime Sparks de Las Casas Peruko kontsul nagusia izan zen ekitaldian, baita Aitor Basterretxea Ondarroako zinegotzia ere. “Eskertzekoa da Udalaren babesa, batez ere kultur arloak logistikan, baimenetan eta eszenatokiarekin lagundu baitigu”, azaldu dute Tupayko kideek. Radixu Irratiak eta Zaldupe Eskolako guraso elkarteak ere laguntza eskaini zuten materialarekin eta kartelen euskarazko itzulpenarekin.
Arratsaldean Peruko kostalde, mendialde eta oihaneko dantza folklorikoak eskaini ziren, baita orkestraren zuzeneko musika eta herrialdeko gastronomia dastatzeko aukera ere. “Jende askok esan digu une batez Perun sentitu zela”, nabarmendu dute antolatzaileek. Euskal herritarrak ere gerturatu ziren: “Gure kulturara hurbildu ziren, janaria probatu zuten eta oroigarriak eraman zituzten”.
Argazkia: Asociación Peruana Tupay
Jaialdia 00:30 arte luzatu zen, eta amaieran antolatzaileek dena garbi eta txukun utzi zuten. Tupay elkarteko kideek gogora ekarri dutenez, guztia borondatez eta autofinantzaketaren bidez antolatu dute: “Ez dugu inolako kanpo diru-laguntzarik jaso; aurretik egindako ekitaldiekin bildu dugu festa hau antolatzeko dirua”.
Ekitaldiaren balorazioa “oso positiboa” izan da. “Oso eskertuta gaude etorri diren peruar guztiekin, baita herritarrekin eta bertaratu ziren turista holandar, frantses eta britainiarrekin ere”, azaldu dute. Gaztetxekoek soinua kudeatzen lagundu zuten, eta horiei ere eskerrak eman dizkiete.
Bereziak izan dira, halaber, Tupay elkarteko bazkideei egindako esker hitzak: “Borondatez lan egin dugu denok, ilusioz eta elkarlanean. Bazkide bakoitzaren ahaleginari esker egin dugu posible hain festa aberatsa eta duina antolatzea”. Elkarteko kideen konpromisoa eta lan kolektiboa nabarmendu dute une oro.
Argazkia: Asociación Peruana Tupay
Tupay elkartearen arabera, Ondarroak gero eta sona handiagoa du bai kultur eta ekonomia mailan, baita turismo eta ostalaritzaren ikuspegitik ere. “Festa honek, gure herrialdearen oroimena bizirik mantentzeaz gain, kulturartekotasuna eta elkartasuna ere islatu ditu”, adierazi dute amaieran.
