Domekan, olatu artean egingo da aldarria
Euskal presoen, iheslarien eta deportatuen eskubideen aldeko mobilizazioak egingo dira Hego Euskal Herriko 11 hondartzatan
Datorren igandean (abuztuak 3), elkartasun olatu berri batek hartuko ditu Hego Euskal Herriko kostaldeko hondartzak. Sare eta Etxeratek deituta, “Behin betiko txanpa etxera” lelopean, mobilizazio jendetsuak egingo dira 11 hondartzatan, eguerdiko 12:00etan. Ekimenak helburu garbia izango du: euskal preso, iheslari eta deportatuen etxeratzea exijitzea eta bakearen, konponbidearen eta elkarbizitzaren aldeko urratsak aldarrikatzea.
Bizkaian, zortzi hondartza izango dira mobilizazioaren gune: Bakioko hondartza, Laga eta Laida, Eako hondartza, Isuntza, Laidatxo, La Arena eta Arrigorri. Gipuzkoan, berriz, Santiago hondartza, Kontxako hondartza eta Oribarzar hondartzetan bilduko dira herritarrak. Aurreikuspenen arabera, milaka lagunek hartuko dute parte, eta kostaldeko hainbat herritan azken prestaketak egiten ari dira jada.
Iraganetik etorkizunerako begirada. Igandeko deialdia ez da soilik aldarri simboliko bat: ETAk bere jarduera amaitu zuenetik 15 urte betetzear dauden honetan, antolatzaileek azpimarratu dute oraindik ere gatazkaren ondorioek bizirik dirautela, eta horren aurrean beharrezkoa dela erantzun kolektiboa.
“Bakea eraikitzeko, iraganari begiratu eta etorkizuna eraiki behar dugu,” adierazi dute Sare eta Etxerateko ordezkariek. “Horregatik, dei egiten diogu herritar orori igandean kostaldera hurbiltzeko”
Lea-Artibai eta Mutrikuko herritarrek parte hartze aktiboa izango dute aurten ere. Lekeitio eta Ondarroako mobilizazioetan jende ugari biltzea espero dute antolatzaileek.
Oihartzuna, hondarrez hondar. “Etxera bidean, urrats bakoitza beharrezkoa da,” esan dute antolatzaileek. Igandeko mobilizazioa izango da, hain zuzen, urrats horietako bat: irudi kolektibo bat, herri baten aldarria oinarrian duena.
