Karraspioko hondartzan boleiboleko jaia ospatu da beste urte batez
Uztaileko azken egunetan ospatu zen Karraspioko hondartzan uda garaiko hitzordu klasikoetako bat: Marierrota taldeak urtero antolatzen duen TXIKI/GAZTE eta NAGUSI BOLEI txapelketa. Aurtengo edizioak ez zuen hutsik egin, eta eguraldiak traba jarri arren, parte-hartzaileek zein ikusleek ez zuten hutsik egin Karraspio hondartzan.
Txiki eta gazteen txapelketa uztailaren 30ean jokatu zen. Euri, haize eta hotzari aurre eginez, jokalariek gogo biziz jokatu zituzten partidak. Txikien kategorian zortzi taldek hartu zuten parte, eta gazteetan, hamaika taldek.
Txikietan, Gojenola-Jauregi-Goikoetxea hirukoteak eskuratu zuen lehen postua; Gabiola-Montiel-Montiel taldeak bigarrena, eta Mintegia-Mintegia-Huerta izan ziren hirugarren sailkatuak.
Gazteen artean, Larriba-Garcias bikotea gailendu zen. Arrinda-Albizu izan ziren bigarren, eta Arrinda-Txopitea, hirugarren.
Antolatzaileek eskerrak eman dizkiete “eguraldi txarraren aurrean ere Karraspiora gerturatu ziren ikusleei”, eta parte hartzaileei ere bai, “urte bat gehiagoz jarrera bikaina eta gogo bizia erakusteagatik”.
Nagusien txapelketa uztailaren 31n ospatu zen, eta oraingoan eguraldiak lagun egin zuen. Goizez jokatu zen txapelketa eta 32 bikotek hartu zuten parte. Lehen fasean multzoka banatuta jokatu ondoren, 16 bikote sailkatu ziren final-zortzirenetara, eta hortik aurrera, kanporaketaz kanporaketa, irabazleak erabaki ziren.
Azkenean, Txurruka-Madarieta bikotea izan zen garaile, Arrinda-Bugallo bigarren, eta Markes-Legarza hirugarren.
Antolatzaileek balorazio “oso positiboa” egin dute: “Parte-hartzaileen kopuruak gora egiten jarraitzen du eta jarrera eredugarria da urtero taldeen aldetik. Herriko eta eskualdeko jende gehiago animatzea gustatuko litzaiguke hurrengo edizioetarako”.
Txapelketa Karraspio hondartzan jokatu zen, eta aurten 24. edizioa izan da. Urtez urte sendotuz, udako kirol ekitaldi aipagarrienetako bat bilakatu da Lekeition.
