Donostian erabakiko dira Jai Alai Ligaren txapeldunak
Jai Alai Liga sailkapeneko zortzi gizonezko nahiz emakumezko puntistarik onenak izango dira garaipenaren lehian, Donostian. Irailaren 15ean jokatuko dira lehenengo finalerdiak; 22an, bigarrenak; final handia hilaren 29an izango da.
Argazkia: Eraman Jai Alai. Jai Alai Ligaren finalak Donostian jokatuko dira, lehen aldiz, irailaren 15, 22 eta 29an. Karmelo Balda pilotalekua agertoki izango dituen Lauko Finalek hamaika hilabeteko denboraldi luzeari itxiera emango diote, ze, Eraman Jai Alaitik azaldu dutenez, gizonezkoen kasuan, 30 txapelketa izan dira bidea egin dutenak, hainbat tokitan jokatuz; tartean Ipar eta Hego Euskal Herria, Frantzia eta Estatu Batuetako Florida. Aditzera eman dutenez, Donostiako Lauko Finalean “ligako 4 aurrelari eta 4 atzelari onenek” hartuko dute parte, gizonezko zein emakumezkoen kategorian.
Xabier Barandika gernika-lumotarra eta Imanol Lopez zumaiarra dira egungo txapeldunak, eta, beraz aurten ere txapel hori defendatzearen alde borrokatuko dute. Emakumezkoen kategorian, berriz, berezia da aurtengo hitzordua; Jai Alai Ligaren lehen aldia izan da, eta, hala, “ligaren historiako lehen final handia izango da”. Jai Alai Ligak”eskerrak eman” nahi izan dizkie parte hartzaile guztiei, eta aurreratu dute “denboraldi berrirako berrikuntzak” prestatzen ari direla.
Sailkapeneko zortzi puntista onenak izango dira Donostian protagonista. Horretarako, pilotariak urtean zehar puntuak biltzen joan dira, eta slam, master eta series kategorietako txapelketak baliatu dituzte horretarako. Gizonezkoen lehian 43 puntistak hartu dute parte; emakumeen lehian, aldiz, hogeik. Bietan ala bietan, sailkapeneko aurrelari onenak atzelari onenarekin osatuko du bikotea, bigarrenak bigarrenarekin, hirugarrenak hirugarrenarekin, eta laugarrenak laugarrenarekin, hurrenez hurren.
Argazkia: Eraman Jai Alai.
Gizonezkoetan, Aritz Erkiaga izan da puntu gehien lortu dituen aurrelaria, 17.900 puntugaz. Aurrelariekin jarraituz, bigarren postua Johan Sorozabalek eskuratu du, 13.900 puntugaz. 13.780 puntugaz, berriz, Eñaut Urreistik lortu du hirugarren postua, eta laugarren sailatua Xabi Barandika izan da. Atzelarien kasuan, Gorka Sorozabalek lortu du lehen postua, 16.820 puntugaz. Bigarrena, Unai Lekerikak, 13.710 puntugaz. Hirugarren sailkatua Thibault Basque izan da, 13.340 puntugaz, eta azkenik, laugarren sailkatua Imanol Lopez izan da, 12.270 puntugaz.
Emakumeen kasuan, aldiz, Ihart Arakistainek lortu du aurrelarien arteko lehen postua, 4.280 puntugaz. Hurren, Maite Ortiz de Mendibil sailkatu da, 3.920 puntugaz. Hirugarren postua Elaia Gogenolak lortu du, 3.880 puntugaz, eta azkenik, Oihana Sorozabal sailkatu da, 2.680 puntugaz. Atzelarietan, Frida Watkinsentzat izan da lehen postua, 3.020 puntu eskuratuz. Maialen Aldazabal izan da bigarrena, 3.640 puntugaz. Hirugarrena, 3.040 puntugaz, Maia Goikoetxea, eta azkenik, laugarren atzelaria Arai Lejardi izan da, 3.000 puntugaz.
Bikoteak.
Gizonezkoen kasuan, Johan Sorozabal-Unai Lekerika, Aritz Erkiaga-Gorka Sorozabal, Xabier Barandika-Imanol Lopez eta Eñaut Urreisti-Thibault Basque izango dira bikoteak; emakumezkoetan, Ihart Arakistain-Frida Watkins, Elaia Gogenola-Maia Goikoetxea, Oihana Sorozabal-Arai Lejardi eta Maite Ortiz de Mendibil-Maialen Aldazabal. Antolakuntzatik azaldu dutenez, Lauko Finaleko partidak “kanporaketa zuzenak” izango direla. Halaber, finalerdietan, liga sailkapeneko lehen bikotea laugarrenaren aurka lehiatuko da, eta bigarrena hirugarrenaren kontra. Aipatutako bi partiden irabazleak lirateke Final Handia jokatuko luketenak eta, horrenbestez, haien artean erabakiko litzateke2024-25 denboraldiko Jai Alai Liga garaipena nork poltsikoratuko lukeen.
Argazkia: Eraman Jai Alai.
Hiru astelehenetan banatuko da Lauko Finala. Irailaren 15ean Arakistain eta Watkinsek Sorozabal eta Lejardi izango dituzte aurrez aurre, emakumezkoen lehian. Gizonezkoen lehian, Johan Sorozabalek eta Lekerikak Urreisti eta Basqueren aurka jokatuko dute. Bigarren finalerdiak irailaren 22an jokatuko dituzte: Gogenola eta Goikoetxea Ortiz de Mendibiden eta Aldazabalen aurka arituko dira emakumezkoetan; Erkiaga eta Gorka Sorozabal, Barandikaren eta Lopezen aurka, gizonezkoen partiduan. Final handirako txartelak lortzearen alde borrokatu beharko dute bikoteek, irailaren 29ko finalean egon nahi baldin badute. Antolatzaileek azaldu dute partida guztiak 19:00etan izango direla. Sarrerak salgai daude www.eramanjaialai.com webgunean.
