Arte eszenikoen balio politikoaz jardun dute Ondarroako Gaztetxean
Arte eszenikoak erdigunean jarriz, egun guztiko egitaraua antolatu zuen domekan Ondarroako Gazte Asanbladak. Antolatzaileek, egunaren balorazio "ona" egin dute.
Mahaingurua, Ondarroako Gaztetxean.OGA. Ikasturteari hasiera emanez, Arte eszenikoen eguna antolatu zuen Ondarroako Gazte Asanbladak domekan [iraiak 21]. Arte eszenikoa lehen lerrora ekarri, eta honen balio politikoaz jardun zuten. Antolatzaileek egunaren balorazio “ona” egin dute: “Domekako egunak arte eszenikoei gaztetxean tokia egin eta hauen balio politikoaz hausnartzeko aukera eman zigun, baita, arte eszenikoen inguruan dabilen jendea batzeko ere. Eguneko ekintzetan parte hartu zuten artista zein publikoa gustura egon zen. Arte eszenikoen gaia, beste zenbaiten artean, ezinegona sortzen duen gai bat da, aurrerantzean landu beharrekoa”.
Dantza tailerragaz hasi zuten goiza, eta bertan, maila eta diziplina ezberdinetako dantzariak elkartu ziren: “Koordinazio ariketak, dantza garaikideko teknika ezberdinak eta taldeko inprobisazio dinamikak landu genituen”. Ondoren, mahainguruan batu ziren gaztetxean, eta ideia desberdinen bueltan aritu ziren: “Arte eszenikoak betiko zirkuituetatik atera eta gaztetxeetara eta espazio autogestionatuetara hurbiltzeko dagoen beharraz aritu ginen. Horrez gain, gaur egun, artea edukiz hustuta kontsumitzeko joera eta forma estetiko soil bezala ulertzen dela ere hitz egin genuen, horren adierazle izanik, hasieran kritika politiko gisa sortutako korronte artistikoak egun soilik forman edo itxuran mantentzea. Gainera, uste dugu, artea giza jarduna den heinean, gizartea eraldatzeko balio behar duela, eta ez soilik errealitatea islatzeko. Honetan datza aurretiaz aipatutako potentzialtasun politikoak”.
Arratsaldean Enbata kolektiboaren antzezlana ikusteko aukera egon zen; izan ere, Nabiga Kolektiboko kideak ezin izan ziren Ondarroara etorri, osasun arazoak zirela medio. “Enbatako kideek hurrengo galdera bota zuten: Zer irakats diezagukete euskal folkloreko pertsonaiek eta dantzek gaur egunaz? Hartza, mamuak, beharginak… bezalako pertsonaiek parte hartu zuten, haien jatorrizko funtzioa eta gaur egun duten esanahia azpimarratuz, modu parte hartzaile eta fresko batean aurkeztuz”.
Hala, Ondarroako Gazte Asanbladatik egunaren balorazio “positiboa” egin da, eta aurrerantzean landu beharreko gaia izango dela azpimarratu dute.
Arte eszenikoaren eguna, dantza tailerra.OGA.
