Hesteetako mikrobioak eta pertsonen garuna izango dute hizketagai Zientziaren Giltzaken hitzaldian
Ignacio Lopez-Goñik eskainiko du asteleheneko [irailak 29] hitzaldia, 18:30ean, Kofradia Zaharrean.
Ignacio Lopez-GoñiNafarroako Unibertsitatea. Zientziaren Giltzak Elkarteak Ignacio Lopez-Goñi (Iruñea, 1962) mikrobiologiako katedradunaren Mikrobiota eta garuna hitzaldiarekin emango dio hasiera ikasturteari astelehenean [irailak 29], 18:30ean, Ondarroako Kofradia Zaharrean. Bertan, hesteetako mikrobioek pertsona bakoitzaren aldarteari nola eragiten dioten kontatuko du hizlariak.
Hesteetako mikrobioek aldartean duten eragina baieztatzeko, ondorengo adibidea jarri du Lopez-Goñik: “2016an esperimentu harrigarri baten emaitzak argitaratu ziren. Sagu talde bati hesteetako bakterio guztiak depresioa duten beste batzuekin aldatu zizkioten. Egun batzuen buruan, saguak deprimitu egin ziren. Beraz, depresioa transplantatu daiteke”. Gizakia ekosistema konplexua dela azpimarratu du katedradunak, eta bakoitzaren mikrobioen eta zelulen artean milioika elkarreragin daudela: “Mikrobiotaren osaeran aldaketak aurkitu dira 300 gaixotasun baino gehiagotan: obesitatea, 2 motako diabetesa, gaixotasun autoimmuneak, depresioa, parkinsona, alzheimerra edo autismoa”.
Hizlaria. Ignacio Lopez-Goñi mikrobiologiako katedraduna izateaz gain, Zientzia Museoko Zuzendaria eta Nafarroako Unibertsitateko Kultura Zientifikoko eta Berrikuntzako Unitateko Zuzendaria ere bada. Aspalditik uztartzen ditu irakaskuntza eta ikerketa lanak zientziaren dibulgazio jarduerarekin. Gainera, MicroBIO blogaren egilea da, “mikrobiologian eta birologian onenetakoa”.
Osasunarekin lotutako zenbait libururen autorea ere bada: ‘Funtzionatzen al dute txertoek?’, ‘Mikrobiotak, zure organismoko mikrobioak’, ‘Virusy pandemiak’, ‘Prest hurrengo pandemiarako’ eta ‘Osasun globala: ingurumen-mehatxuari aurre egiteko estrategia berria’. Horrez gain, gazteen anorexiaren arazoari buruzko Princess de cristal liburua idatzi du, alabarekin batera.
Sariak ere jaso ditu Lopez-Goñik bere ibilbide profesionalean; besteak beste, Bioteknologiaren Komunikazio eta Zabalkunderako ASEBIO, Dibulgazio Zientifikoa Lilly Fundazioa, COSCE (Espainiako Elkarte Zientifikoen Konfederazioa) saria, eta Zientziaren Hedapena saria.
