Aitor Garitano bergararra izango da Xemein Abesbatzaren zuzendari berria
Garitanori ongi etorria emateagaz batera, Xabier Mendezek eta Itxaso Jaiok egindako lana eskertu dute abesbatzako kideek.
Aitor Garitano zuzendari berria eta Xabier Mendez eta Itxaso Jaio zuzendari ohiak. Xemein Abesbatzarentzat ikasturte garrantzitsua izango da aurtengoa, izan ere, 2026an 50 urte beteko dira Jose Luis Lauzirika arratzuarrak abesbatza sortu zuenetik. Ordutik zuzendari ugariren esku egon da taldearen gidaritza, eta zerrenda horretara beste izen bat gehituko dute aurten: Itxaso Jaio Ibarluzearen erreleboa hartuko du Aitor Garitano bergararrak.
Hala, gogoz hasi dute ikasturtea abesbatzako kideek: “Abeslari bikaina da Aitor, eta hainbat abesbatzen zuzendaria ere bai. Jada hasi gara berarekin entseatzen. Proiektu interesgarri asko ditugu aurrerantzean, eta berarekin lantzeak pozarren jartzen gaitu”. Garitanok Gasteizeko kontserbatorioan hasi zuen musika ikasketen ibilbidea, eta Musikenen amaitu. Era berean, hainbat opera emanalditan ere parte hartu du, eta baita ize handiko jaialdi nahiz aretotan ere. Gaur egun, beste hainbat proiekturen artean, Garitano da Oñatiko Ganbara Kantu Eskolako, Beasaingo Loinaz abesbatzako eta Soraluzeko Ezoziko Ama Abesbatzako zuzendaria ere, Beasaingo musika eskolako irakasle izateagaz batera.
Garitanori ongi etorria emateagaz batera, Xabier Mendez Aretxabaletak bi urte eta erdian abesbatzako zuzendaritzan egindako lana eskertu dute: “Korua haztea eta gaztetzea lortu du bere lanarekin, eta beti egongo da lekua zuretzako gure artean. Etorri bisitan nahi duzun guztietan”. Era berean, Jaiok egindako lana ere ez dute ahaztu: “Eskerrik asko Itxasori ere, hilabete hauetan zuzendaritza lana hartzeagatik. Beti dago prest laguntzeko, momentu zail desberdinetan gidaritza hartu du, eta bera barik ez genuke aurrera egingo. Koruko gazte guztiak bere eskuetatik pasatu gara, eta musika korala zoragarria dela erakutsi digu. Hemen aurrera, bere ahots eta irribarrearen gozatzen jarraituko dugu”.
