Bizkaidendak topaketak ospatuko dira barikuan, Ondarroan
Bizkaiko Foru Aldundiaren 'Bizkaiko merkataritza. Oso Pro. Proatiboa. Profesionala. Eta oso gertukoa' kanpainaren baitako topaketak izango dira. Urtza Alkorta Arrizabalaga alkateak emago die ongietorria bertaratuei.
Oso Pro kainpainaren aurkezpena. Bizkaiko Foru Aldundia. Ondarroako Kofradia Zaharrean batuko dira barikuan [urriak 3] udalerriko merkatariak Bizkaiko merkataritzan etorkizun PRO baten arrakastarako lelopean antolatutako Bizkaidendak topaketetan. 14:00etan hasiko da hitzordua, eta Urtza Alkorta Arrizabalaga udalerriko alkateak emango die ongietorria bertaratuei. Ondoren, Ainara Basurko Ekonomia Sustatzeko Saileko Foru Diputatua arduratuko da ekimenaren irekieraz.
Topaketan merkatariek ere hartuko dute hitza, izan ere, Dra!ren esperientzia kontatzera igoko da Saioa Sarria, eta Unai Garciak Arratek informatikaren ibilbidea partekatuko du. Gero, Alfredo Rodiguezen txanda izango da, eta kontsumitzaileen belaunaldi berriak erakartzeari buruz hitz egingo du. Amaitzeko, Bizkaidendak Elkarteko ordezkariek hartuko dute hitza, eta tokiko merkataritzari balioa ematean jarriko dute fokua.
Ondarroako Dendari eta Ostalarien Elkartea den Zatoztek emango dio itxiera egitasmoari. Gainera, bertaratu nahi duenak izena eman beharko du zatozte2@gmail.com helbidera mezua bidalita edo 656 74 24 45 telefono zenbakira deituta.
Kanpaina. Bizkaiko Foru Aldundiak martxan jarritako Bizkaiko merkataritza. Oso Pro. Proatiboa. Profesionala. Eta oso gertukoa kanpainak Bizkaiko tokiko saltoki txikiaren irudia berritzea du helburu, “garai berrietara egokitzeko gaitasuna eta tokiko ekonomiarentzat duen garrantzia nabarmentzeko”.
Bizkaiko Foru Aldundiak iaz jarri zuen martxan kanpaina, BibaoDendak, Bizkaidendak -Bizkaiko Merkatari, Ostalari eta Zerbitzu Enpresen Federazioa- eta Cecobi -Bizkaiko Merkataritzako Enpresa Konfederazioa- merkatarien elkarteekin elkarlanean. Era horretan, tokiko merkataritzaren leihakortasuna hobetzeko eta negozio eredu berritzaileago, digital eta hurbilago baterako eraldaketa sustatzeko ekintzak bultzatzen ditu: “Bizkaiko saltoki txikiek erronka handiei egin behar diete aurre, teknologia, demografia eta ingurumen eraldaketen ondorioz”.
Oso Pro kanpainak ibilbide luzeko ikuspegia duela zehaztu dute Bizkaiko Foru Aldunditik: “Legegintzaldi osoan hedatuko diren hainbat fase ditu. Helburua da Bizkaiko Saltoki txikiaren pertzepzioa hobetzea, ez soilik kontsumitzaileen artean, baita merkatarien artean ere, lanbidearekiko harrotasuna sustatzeko eta beren negozioak kontsumo joera berrietara egokitzera bultzatzeko”.
